85 jasynda Eýropanyń bas júldesin ıelendi

Tarıhqa kóz júgirtsek jasy ulǵaısa da óziniń jas kezindegi qarym-qabiletin joǵaltpaǵan aıryqsha jandar jónindegi derekterge tap bolamyz. Al jasy seksenniń beseýine qaraǵan oraldyq aqsaqal Dárjan Imanǵalıevtiń jóni tipten bólek. Bul kisiniń sanaly ǵumyry bıznes degen uǵym men túsinik tildik qorymyzǵa dendep kire qoımaǵan sonaý keńestik kezeńde ótkizilgen. Ol sol ýaqytta obkomnyń qarjy-sharýashylyq bólimin basqarǵan.

Dákeń munda uzaq jyldar boıy abyroımen eńbek etip, qurmetti eńbek demalysyna shyqqan kezde sosıalıstik qoǵamy­nyń shegeleri bylqyldap, bosaı bastaǵan bolatyn. О́zi­niń kúsh-qaıraty jáne erik-jigeriniń moldyǵymen talaılardy tańǵaldyryp kelgen el aǵasy, árıne, qarap jata almady. Sóı­tip, keńes dáýiriniń ózinde bızneske bilek sybana kirisip ket­­­ti. Bul kezde qoǵamda bankiden nesıelik qarajattar alyp, oǵan qu­rylys nysandaryn salý isine múldem túren túspegen edi. Mine, alpystan asqan shaǵynda, sonaý 90-jyldardyń bas kezinde D.Imanǵalıev respýblıkada alǵashqylardyń biri bolyp, osyndaı tyń qadamǵa barýǵa bekem bel býdy. Kóz qorqaq, qol batyr degendeı, kóp keshikpeı qolǵa alǵan isin bastap ta ketti. Taǵy bir súısinerlik jaıt, jańalyqty jatsynbaǵan dara qasıet ıesi Dárjan Tileshulynyń bastamasymen turǵyzylǵan eńseli ǵımarattar men nysandar Oral qalasynynń arhıtektýralyq ajaryna aıryqsha úles qosty. Áýel basta berik negiz qalansa – bıznes qashanda tabys­ty­ júretinine, toqtap, toqyrap qalmaıtynyna 85-ke kelgen Aq­jaıyq­tyń asa syıly, abyroıly aqsaqaly Dárjan Imanǵa­lıev jetekshilik jasaıtyn kásiporynnyń tynys-tirshiligi arqyly da kóz jetkize alamyz. Ol búginde óz bıznesiniń 25 jyl­dyq asýyn atap ótýge qam jasap otyr. Eń bastysy, munda adam­dar turaqty jumyspen qamtylǵan. Serkitestiktegi tabys kózderi­niń jyldan-jylǵa óse túsýi olardyń berik senimderin ornyqtyrǵan. Seksenniń seńgirinen áldeqashan asyp ketse de, bıznestiń qupııa syrlaryna úńilýden tanbaǵan el aqsaqaly taıaýda halyqaralyq marapatqa da ıe boldy. Oǵan sonaý Shveısarııadan sapa úshin belgilengen Eýropanyń bas júldesi jetkizildi. О́tken mamyr aıynda Aqjaıyqtyń aqsaqal bıznesmeni Jenevadan shaqyrý alǵan bolatyn. О́kinishke qaraı, ol bul saparǵa densaýlyǵyna baılanys­ty bara almady. Sodan keıin atalǵan halyqaralyq marapatty taǵaıyndaǵandar ony Qazaqstanǵa, onyń ıesine jetkizip berdi. Atalǵan halyqaralyq marapattyń qyr-syryna tereńirek toqtalsaq, Shveısarııanyń fransýz tildi kásipkerler federa­sııasynyń ónerkásip jáne tehnologııalar agenttigi 2014 jylǵy 26 mamyrdaǵy sheshimimen «Shaǵyn bıznes kásipornyn tabys­ty basqarý» atty atalymyndaǵy halyqaralyq konkýrstyń qorytyndysyn shyǵarǵan. Soǵan sáıkes atalǵan agenttik 85 jastaǵy qazaqstandyq kásipker Dárjan Imanǵalıev pen ol basqaratyn «Tilesh» JShS-in jeńimpaz dep taýypty. Bul sóz joq, joǵarǵy aıtyp ótkenimizdeı jasy ulǵaısa da izdenisin toqtatpaǵan, óz boıyndaǵy qarym-qabiletin joǵaltpaǵan Oral óńirindegi shaǵyn bıznes ókili úshin úlken abyroı, bıik mártebe, ári óz ýaqytyna jetpeı shaý tartyp qalǵandar úshin úlgi-ónege ekeni anyq. Sondyqtan da, biz búgin osy jaǵymdy jańa­lyq­ty gazet oqyrmandarynyń nazaryna usynǵandy jón kórdik. Temir QUSAIYN, «Egemen Qazaqstan». Batys Qazaqstan oblysy.