Qazaqstanda áıelder dzıýdosynyń damý barysy tym baıaý ekeni belgili. Shırek ǵasyrǵa jýyq álemdik deńgeıdegi dodalarda birde-bir balýanymyz júlde almaǵandyqtan, Mońǵolııadan Galbadrah Otgonsesegti shaqyrttyq. Bizdiń eldiń týy astynda óner kórsetken ol kóptegen bıik belesti baǵyndyrdy. Atap aıtsaq, 2015-2021 jyldar aralyǵynda Galbadrah Rıo Olımpıadasy men eki birdeı álem chempıonatynda jáne Azııa oıyndarynda qola medal ıelenip, qurlyq chempıony atandy. Mońǵol sportshysy tatamımen qoshtasqannan keıin Ábıba Ábýjaqynova jarq etip shyqty. Qarǵadaı qazaq qyzy bul kúnderi óreli ónerimen jankúıerlerdi qýantyp júr. Dál osy halyqaralyq áıelder kúni qarsańynda Ábıbamen tildesýdiń reti keldi.
– Ábıba, byltyr Astanada ótken Azııa chempıonatynda kúmis medal ıelenip, jankúıerlerdi bir qýantqan ediń. Sol kezde sóıleskenimizde «Buıyrtsa, aldaǵy álem chempıonatynda júlde alý úshin barymdy salamyn» dep aqtaryla sóılediń. Aıtqan ýádeńde turyp, Tashkentte qola medaldi qorjynǵa saldyń. Sol belesten kóriný qanshalyqty qıyn boldy?
– Tórtkúl dúnıeniń teńdessizderi jınalǵan jarysta kúresý qashan da qıyn. О́zbekstannyń astanasyna kileń myqtylar keldi. Men óner kórsetetin 48 kılo salmaq dárejesinde de básekelestik óte kúshti boldy. Tusaýkeser kezdesýimde brazılııalyq Amanada Lımany taza uttym. Kelesi kezeńde Eýropa chempıony, álemdik reıtıngte kósh bastap turǵan fransııalyq Shırın Býklıden basym tústim. Shırek fınalda qurlyq birinshiliginiń qola júldegeri serbııalyq Mılısa Nıkolıchti san soqtyrdym. Jartylaı fınalda álem chempıony, Azııa oıyndarynyń jeńimpazy, japonııalyq Nasýmı Sýnodaǵa álim jetpedi. Al qola medal úshin tartysta chılılik Marı Dı Vargas Leıdiń osal tusyn taptym.
Bul beldesýlerdiń birde-bireýinde jeńis maǵan ońaılyqpen kelgen joq. Ár beldesýde barymdy saldym. Qalaı da elge oljaly oralýdy kózdedim. Ásirese, sońǵy aıqas asa aýyr soqty. О́ıtkeni jartylaı fınalda men buryn synǵan qolymdy qaıta jaraqattap alǵan edim. Soǵan qaramastan sońǵy sekýndtarǵa deıin aıqastym. Sóıtip, Allanyń qalaýy jáne ózimniń tabandylyǵymnyń arqasynda jeńis tuǵyryna kóterildim.
– Sol kezdegi kóńil kúıińmen bólisseń?
– Ony sózben jetkize almaspyn. Talaı jylǵy tynymsyz eńbegimniń aqtalǵanyna, kúlli qazaq jankúıerleriniń senimin aqtaı alǵanyma qatty qýanyp, erekshe shattandym.
– Tashkenttegi jeńisińdi kimge arnadyń?
– Anama arnadym. Ár jarysqa attanǵan saıyn anashym túni boıy uıyqtamaı, men úshin qatty ýaıymdaıdy. Jaratýshyǵa jalbarynyp, duǵa qylady. Osy saparǵa attanǵanymda da dál solaı boldy.
– Sen – qazaq qyzdary arasynan álem chempıonatynda júlde alǵan tuńǵysh dzıýdoshysyń. Osy jaǵdaı saǵan qalaı áser etýde?
– Men úshin bul – úlken mártebe. Osy sport túrimen aınalysa bastaǵanymda dál osyndaı dárejege jetemin dep esh oılamadym. Desek te etken eńbek esh ketpeıdi eken. Muny men jattyǵý zalynda shelektep tókken terimniń óteýi dep bilemin. Oǵan bapkerlerimniń eren eńbegin qosyńyz. Biraq osy tabystarymdy qanaǵat tutyp, qol qýsyryp otyrýdan aýlaqpyn. Alda kóz arbaǵan asýlar kóp. Solardyń shyńyna shyǵý úshin sheberligimdi áli de shyńdaı túsýge tıispin.
– Osy jyl da sen úshin sátti bastaldy ǵoı...
– Onyńyz ras. Qańtar aıynda Portýgalııanyń Almada qalasynda ótken Gran-prı dodasynda altynnan alqa taqtym. Fınalda ózimniń komandalyq áriptesim ári qurbym Ǵalııa Tynbaevadan aılamdy asyrdym. Aqpan aıynda Fransııanyń bas shahary – Parıjde qola medal oljaladym. Sóıtip, Halyqaralyq dzıýdo federasııasynyń (IJF) reıtınginde úshinshi orynǵa kóterildim.
– Álemdik reıtıngte senen kimder joǵary tur?
– Shırın Býklı men Nasýmı Sýnoda. Tashkenttegi álemdik dodada olardyń ekeýimen de kúreskenimdi joǵaryda aıttym ǵoı. Fransııalyq balýandy uttym, japonııalyq sportshydan jeńildim.
– Qysqa ǵana merzim aralyǵynda uzaq jyldar boıy qazaq qyzdary baǵyndyra almaı júrgen belesterdiń bıigine kóterildiń. Sol úshin de saǵan dán rızamyz. Al endi aldaǵy josparlaryńmen bólisseń.
– Aldaǵy jarystarda da Alash jurtyn qýanysh pen shattyqqa bólesem deımin. Al basty maqsatym – bıyl Dohada jalaýy jelbireıtin álem chempıonaty men kelesi jyly Parıjde alaýy tutanatyn Olımpııa oıyndarynda jeńis tuǵyryna kóterilý.
– Ábıba, áńgimeńe kóp rahmet. Kózdegen maqsatyńa jetýińe tilektespiz.
Áńgimelesken
Ǵalym SÚLEIMEN,
«Egemen Qazaqstan»