«Qazgıdromet» RMK qar sýynyń mólsheri, topyraqtyń kúzgi ylǵaldylyq kórsetkishi, jerdegi tońnyń qatý tereńdigi, ózenderdegi muzdyń qalyńdyǵyn taldaı otyryp, elimizdegi sý tasqyny qaýpi bar aımaqtardy anyqtady. Sonyń alǵashqy úshtigine segiz dalalyq ózeni bar Aqtóbe oblysy da endi. Dalalyqta topyraqtaǵy tońnyń qatý tereńdigi Aqtóbe oblysynda ótken jylǵy kórsetkishterden orta eseppen 5-ten 115 sm-ge deıin joǵary.
Qazirgi kezde óńirde qala men sý basý qaýpi bar eldi mekenderdi tasqyn sýdyń qaterinen qorǵaý úshin jedel shtab quryldy. Birer kún buryn Baıǵanın aýdanynyń Altaı batyr aýylynda Noǵaıty ózeni arnasynan tasyp, tas joldaǵy ótkeldi sý shaıyp, beton kópirdi buzyp ketti. Aýyl úıleri men qoralardy sý basyp, turǵyndar óz kúshimen sý keletin yldıǵa qum toltyrylǵan qaptar ázirledi. Qorasy belge deıin sýǵa tolǵan jurt maldy qyr basyna aıdady.
Sońǵy bir apta boıy jaýǵan qar aralas jańbyr saldarynan jaýyn-shashyn mólsheri aılyq normanyń 81 %-yn qurap, oǵan kúnniń kúrt jylynýy qosylyp Aqtóbe qalasynyń kóshelerin de sý basty. О́tken jyldyń osy kezeńimen salystyrǵanda bıyl qar eki ese kóp jaýdy ári kún byltyrǵydan úsh apta erterek kúrt jylyndy. Tap osyndaı tabıǵattyń ózgerisine Aqtóbe qalasynyń kommýnaldyq mekemeleri men qar shyǵarýǵa jaýapty merdiger seriktestikter daıyn bolmaı shyqty. Olardyń jumysynyń salǵyrttyǵynan qala turǵyndarynyń kóshede júrip-turýy qıyndady. О́kinishtisi, jyl saıyn aqtóbelikter osyndaı ábigerge túsedi. Tańerteńgilik ortalyq kóshelerdiń ortan belden sý basýy qoǵamdyq kólikterdiń júrýine qıyndyq keltirdi. Oǵan eń aldymen qardy qys boıy ýaqtyly polıgonǵa shyǵarmaǵan merdiger mekemeler kináli. Aqtóbe qalasynyń ákimi Murat Jórebekovtiń aıtýynsha, qar tazalaýǵa memlekettik tapsyrysty jeńip alǵan mekemelerdiń qar shyǵaratyn, tıeıtin aýyr tehnıkalary bolmaǵan. Ekinshi jaǵynan qala kóshelerinde sýaǵarlar júıesi, aryqtar damymaǵan. Kóp kóshede sýaǵarlar múlde joq. Al sońǵy jyldary salynǵan aryqtarǵa birneshe kúnnen beri sý barmaı, kóshe boıynda kólkildep jatyr. Osyndaı oralymsyzdyqtar Aqtóbe qalasynyń jol ınfraqurylymyn jobalaýda ınjenerlik naqty esepteýler júrgizilmegenin, sýaǵarlardyń kózben jobalap salynǵanyn kórsetti. О́ńirde sý tasqynyna qarsy jumystarǵa qajetti qurylǵylar men zamanaýı tehnıkalar, sý sorǵyshtar, jabyq sýaǵarlardaǵy qatqan muzdy tazalap, eritetin quraldar da joq.
Dalalyq ózender boıyndaǵy eldi mekenderde kóktemgi sý tasqyny aǵyny byltyrǵydan joǵary bolady dep kútilýde. Qar byltyrǵydan da qalyń jatyr, ári ózen basseınderindegi topyraqtyń kúzgi ylǵaldaný kórsetkishi joǵary. Jylda sáýirdiń 10-15 kúnderi dala ózenderi tasıdy. Bıyl da shamamen sol aralyqta sý tasıtyn bolar. Degenmen Aqtóbe oblysynyń aýmaǵynan ótip jatqan Jem,Temir, Or, Yrǵyz, Jińishke, Elek ózenderiniń arnalary tym ortaıyp ketken.
Oblystyq polısııa departamentiniń jeke quramy da kúsheıtilgen jumys rejimine kóshti. Garnızonnyń jeke quramynyń sý basý qaýpi tóngende qoǵamdyq tártipti saqtaý men joldardy jabý daıarlyǵy tekserildi. Sý qoımalary janynda ornalasqan eldi mekender men saıajaı massıvterin sý basqan jaǵdaıda urlyq pen tonaýǵa jol bermeýdiń aldyn alýǵa nusqaýlyq ótkizildi.
Aqtóbe oblysy ákimi Tótenshe jaǵdaı departamentiniń mamandarymen birge Alǵa aýdanynan bastaý alatyn Jińishke ózeni jáne Temir aýdanyndaǵy Temir, Jem ózenderiniń arnasyn baqylap qaıtty. О́ıtkeni Temir aýdany aýmaǵyndaǵy «Shubarqudyq-Oıyl» avtokólik jolynyń 16 shaqyrymynda sý shaıý qaýpi tónip tur. Qazirgi kezde TJD jáne jol mamandary tasyǵan sýdyń kidirissiz ótip ketýi úshin jol boıyndaǵy ótkelderdi tekserip, tazartýǵa kiristi. Sýdyń tabıǵı arnalaryn bógep turǵan qurylystar qalada da, dalada da jetkilikti. Ázirge óńirdegi úsh Aqtóbe, Qarǵaly, Sazdy sý qoımasyndaǵy jaǵdaı turaqty. Aqtóbe oblysynda eń kúshti sý tasqyny 2017 jyly boldy. Kóktemde qar birden erip, qoımalar sýǵa toldy ári sol kezde sý jan-jaqtan kelgen edi. Aıta ketý kerek, Aqtóbe jáne Qarǵaly sý qoımalary 1975 jyly, al Sazdy sý qoımasy 1966 jyly turǵyzylǵan.
Aqtóbe oblysy