Qazaqstan Halyq partııasynan Májilis depýtattyǵyna kandıdat, QHP Atyraý oblystyq fılıalynyń tóraǵasy Baljan Dosmuhambetova Atyraý qalalyq perzenthana ujymymen kezdesti.
Baljan Dosmuhambetova eń áýeli perzenthana dárigerlerine partııanyń saılaýaldy baǵdarlamasyn tanystyrdy.
– Ádiletti Qazaqstanǵa – jaldamaly qyzmetkerlerdiń áleýmettik jáne eńbek quqyǵyn tıisinshe qorǵaıtyn jańa Eńbek kodeksi qajet. Halyq partııasy árbir azamattyń medısınaǵa, bilimge qol jetimdiligi bar, onyń quqyǵy tolyq qorǵalatyn ádil Qazaqstandy qalaıdy. Densaýlyq salasyna MÁMS engizý úmitti aqtamady. Elimizdiń kóp turǵyny jappaı «Damumed»-ke tirkelý men dárigerdiń qabyldaýyna jazylý múmkin emes dep shaǵymdanyp jatyr, – dedi Baljan Dosmuhambetova.
Sondaı-aq ol qabyldanyp jatqan sharalar men zańdarǵa qaramastan, elimizdegi dárigerlerdiń jalaqysyn kóbeıtip, áleýmettik mártebesin qorǵaýdy qajet etip otyrǵanyn tilge tıek etti.
– Biz osy bilim men densaýlyq salasyna ınvestısııa quıyp, jalaqyny esepteýdi túbegeıli qaıta qaraýdy usynamyz. О́ıtkeni bıýdjettik salada áli kúnge deıin esepteý tarıfi burynǵy júıemen tur. Bazalyq jalaqy 10 jyldan astam ýaqyt boıy ózgermegen, – dedi ol.
Keıinnen spıker bilim salasyndaǵy qordalanǵan máselelerge toqtalyp ótti.
Al QHP Shyǵys Qazaqstan oblystyq fılıalynyń tóraǵasy, Parlament Májilisi depýtattyǵyna kandıdat Qaırat Mýsın О́skemendegi balalar aýrýhanasynyń ujymymen kezdesti.
– Halyq partııasy balabaqshalardan bastap halyqqa tegin medısınalyq qyzmet kórsetýdi jáne tegin bilim berýdi qoldaıdy. Sondaı-aq biz dárigerler men medbıkelerdiń, balabaqsha tárbıeshileri men kútýshilerdiń, muǵalimder men jattyqtyrýshylardyń mártebesin kóteremiz. Balalardyń ómirin qutqaratyn jáne tárbıeleıtin barlyq mamandarǵa laıyqty jalaqy tólenýi qajet, – dedi Q.Mýsın.
Sonymen qatar ol memleket 1-3 bala tárbıelep otyrǵan analar úshin qoljetimdi baspana, al kópbalaly analarǵa tegin baspana berýi kerek dedi. Bul usynys partııanyń saılaýaldy baǵdarlamasynda naqty kórsetilgen.