Fransııanyń qurmetti konsýldyǵy ashyldy

Atyraý oblysymen eko­no­mı­kalyq, iskerlik baılanys ornatyp, qomaqty ınvestısııa salǵan eldiń biri – Fransııa. Osy eldiń Qazaqstandaǵy tótenshe jáne turaqty elshisi Fransıs Etenn myrzanyń málim etýinshe, búgingi tańda Qazaqstanda Fransııanyń 50-ge jýyq kompanııasy ár salada jumys isteıdi. Ásirese, fransýz kompanııalary elimizdiń munaı-gaz jáne taý-ken ónerkásibine qyzyǵýshylyq tanytýda. Sonymen birge, temirjol lokomotıvin, ushaq­tar men tikushaqtardy ımporttaý, spýtnıktik baılanys jáne qu­rylys materıaldaryn óndirý, qyzmet kórsetý sekildi salalarda eki eldiń 100-ge birlesken kásiporny qurylypty. Dál qazir atalǵan eldiń Qazaqstan ekonomıkasyna quıǵan ınvestısııasynyń kólemi 9 mıl­lıard dollarǵa jetip otyr. Al Atyraý oblysymen aradaǵy taýar aınalymy ótken jyly 4,2 mıllıard dollardy qurapty. Bul óńirde fransýzdar kapıtaly salynǵan alty iri kásiporyn jumys isteıdi. – Qazaqstannyń ekonomıkalyq órkendeýi, ásirese, Atyraý sekildi ın­vestısııa salýǵa qolaıly aımaqtar álem elderiniń qyzyǵýshylyǵyn týǵyzady, –dedi Fransııanyń elshisi Fransıs Etenn myrza Atyraýdaǵy qurmetti konsýldyqtyń ashylý sal­tanatynda. – Bizdiń elimiz Qazaq­stanmen, sonyń ishinde, Aty­raý óńirimen iskerlik, saýda-ekono­mı­kalyq qarym-qatynasty burynǵydan jan­dandyra túsýdi kózdeıdi. Sol sebepten, munaıly Atyraýmen baı­­lanysty óristetý maqsatynda Fran­sııanyń qurmetti konsýldigin ashýdy kózdedik. Bul – bizdiń Qazaq­stan óńirlerinde qurmetti konsýl­dyǵymyz. Fransııanyń elshisi Atyraý oblysyndaǵy qurmetti konsýl qyzmetin atqarýǵa «Merkýr Hol­dıng» JShS bas dırektory Esenǵalı Báımenovtiń tańdalǵanyn jetkizdi. – Biz Fransııa men Atyraý oblysynyń arasyndaǵy iskerlik jáne mádenı baılanystardy ny­ǵaıtýǵa jumystanamyz, – dep kon­sýldyqtyń aldaǵy maqsatymen bó­listi E.Báımenov. – Sonymen qatar, Atyraý oblysy men basqa óńirlerdiń turǵyndary úshin Fransııaǵa barýǵa vıza alýdy jeńildetip, Atyraýdan Fransııaǵa áýe qatynasyn ashýdy qolǵa almaq josparymyz bar. Atyraý oblysy ákiminiń orynbasary Sh.Muqan bizdiń oblysymyz ben Fransııa arasyndaǵy tyǵyz ekonomıkalyq baılanystar týraly eske saldy. Atap aıtqanda, ol 2013 jyly Atyraý oblysy men Fran­sııa arasyndaǵy taýar aınalymy 4,2 mlrd. dollar quraǵanyn atap ótti. Bul 2012 jylǵa qaraǵanda 12 paı­yz­ǵa kóp. Atyraý oblysynda fran­sýz kapıtaly qatysqan alty iri kásiporyndar jumys isteıdi. Joldasbek ShО́PEǴUL, «Egemen Qazaqstan». Atyraý oblysy.