Almatyda 105 jastaǵy qartqa sátti ota jasaldy, dep habarlaıdy Egemen.kz.
Saıkúl Keıdarova 105 jasta. Áıel jambas súıeginiń joǵarǵy bóligin syndyryp, №7 qalalyq klınıkalyq aýrýhanaǵa shuǵyl túrde jatqyzyldy. Operasııasyz ol bul aýyrsynýdy jeńe almady jáne bul dıagnoz ol úshin ólimge ákelýi múmkin edi.
Almaty qalasynyń №7 qalalyq klınıkalyq aýrýhanasynyń polıtravmatologııalyq bólimshesiniń meńgerýshisi Ramazan Áskerovtyń aıtýynsha, 1918 jyly týǵan naýqasqa tekserýden keıin jambas súıeginiń yǵysýymen jabyq usaqtalǵan pertrokanterııalyq synyǵyna ota jasalǵan. Qazirgi zamanǵy az ınvazıvti hırýrgııalyq aralasý jasaldy: jabyq repozısııa, proksımaldy jambas súıekteriniń osteosıntezi, gamma taıaqshasy.
Naýqas ekinshi kúni aıaqqa turdy.
№7 qalalyq klınıkalyq aýrýhananyń baspasóz qyzmetinde atap ótilgendeı, zamanaýı medısına áldeqaıda alǵa shyqty. О́ıtkeni jaqynda egde jastaǵy adamdar operasııadan bas tartatyn. Degenmen, arnaıy metall qurylymdary men jumsaq anestezııany qoldanatyn az ınvazıvti operasııa ájeni saýyqtyrýǵa kómektesti.
«Biz naýqastyń ómiri úshin úlken jaýapkershilikti sezindik jáne qartaıǵan aǵza narkozdy qalaı qabyldaıtynyna alańdadyq. Biz onyń úıine óz aıaǵymen oralýy úshin barlyǵyn jasadyq», dedi qalalyq jansaqtaý bóliminiń meńgerýshisi Esenaı Espenbetov.
Jabyq jambas synyqtary tirek-qımyl apparatynyń eń aýyr jaraqattarynyń biri bolyp sanalatynyn atap ótken jón. Kóbinese olar qatty aýyrsynýmen, múmkin mol qan joǵaltýmen birge júredi jáne shuǵyl gospıtalızasııany qajet etedi. Jambas súıeginiń trokanterııalyq synyǵy bar egde jastaǵy adamdarǵa medısınalyq kómek ýaqtyly kórsetilmegen jaǵdaıda ólimmen aıaqtalýy múmkin.
Operasııa jaqsy ótti, qart áıel operasııadan keıingi kezeńde ózin jaqsy sezindi. Sol úshin dárigerlerge shyn júrekten alǵys aıtty. Ol qazirgi tańda úıine shyǵarylǵan.