Prezıdent Qasym-Jomart Toqaevtyń Túrkııa Respýblıkasyna jumys sapary aıaqtaldy, dep habarlaıdy Egemen.kz Aqordaǵa silteme jasap.
Sapar barysynda Memleket basshysy Túrkııa Prezıdenti Rejep Taııp Erdoǵanmen kezdesti.
Ekijaqty kelissóz aıaqtalǵannan keıin Memleket basshysy Qasym-Jomart Toqaev pen Túrkııa Prezıdenti Rejep Taııp Erdoǵan Túrki memleketteri uıymynyń kezekten tys sammıtine qatysý úshin Kongress ortalyǵyna birge bardy.
Sondaı-aq Memleket basshysy Qasym-Jomart Toqaev Túrki memleketteri uıymynyń «Apat jáne tótenshe jaǵdaılar menedjmenti, gýmanıtarlyq kómek» atty kezekten tys sammıtinde sóz sóıledi.
Aıta keteıik, Túrki memleketteri uıymynyń kezekten tys sammıtiniń qorytyndysy boıynsha mynadaı qujattarǵa qol qoıyldy:
1.Túrki memleketteri uıymy kezekten tys sammıtiniń Ankara deklarasııasy;
2.Túrki memleketteri uıymynyń Azamattyq qorǵaý mehanızmin qurý týraly sheshim.
3.Túrki ınvestısııalyq qoryn qurý týraly kelisim.