Bıyl Atyraý oblysynda 25 mektepti jańartýǵa 800 mln teńge bólindi, dep habarlaıdy Egemen.kz.
Oblystyq bilim basqarmasy basshysynyń orynbasary Tilekqabyl Baıdoshevtiń aıtýynsha, jańa oqý jyly bastalǵanǵa deıin 25 mektepti jańartý kózdelip otyr.
«2021 jyly Atyraý oblysynda qala men aýdan ortalyqtaryndaǵy, aýyldardaǵy mektepterdi qaıta jańǵyrtý qolǵa alyndy. Bıyl oblysta 25 mektepte qaıta jańǵyrtý jumysy memlekettik satyp alý portaly arqyly júzege asyrylady. Bul maqsatqa bıýdjetten 800 mln teńge bólindi. Jóndeý jumystary kezinde mektepter pándik kabınettermen, jıhazben jaraqtandyrylyp, kitaphanalary men ashanalary jańartylady. Bilim ordalary qaýipsizdik júıesimen qamtylyp, oqýshylardyń ınklıýzıvti bilim alýyna múmkindik jasalady. Bul jumys oqýshylar jazǵy demalysqa shyqqan kezde bastalyp, jańa oqý jylyna deıin aıaqtaý josparlanyp otyr», dep habarlady Tilekqabyl Baıdoshev.
Onyń aıtýyna qaraǵanda, Atyraý qalasynda ornalasqan №32, B.Nysanbaev, Q.Smaǵulov atyndaǵy, Almaly eldi mekenindegi, Jylyoı aýdanynyń №2, №23 mektepteri jańartylady. Sondaı-aq tizimde Inder aýdanynyń K.Abaqan, S.Seıfýllın, Jambyl, J.Myrzaǵalıev atyndaǵy, Isataı aýdanynyń Novobogat, Jańa Janbaı orta mektepteri bar. Bul sanatqa Qurmanǵazy aýdanynda S.Muqanov, N.Imashev, Iý.Gagarın, N.Manaev, Z.Serikqalı atyndaǵy jáne Shortanbaı orta mektepteri engizilgen. Qyzylqoǵa aýdanyndaǵy B.Amanshın, Sh.Erkinov, Y.Shórekov atyndaǵy, Maqat aýdanynan A.Qunanbaev, M.Baımuhanov atyndaǵy, Mahambet aýdanynyń A.Baıtursynov, Qarashauly atyndaǵy orta mektepterde de jańartý jumysy júrgiziledi.
«Mektepterdi qaıta jańǵyrtý aldaǵy jyldary da jalǵasyn tabady. Atyraý oblysynda 2025 jyldyń sońyna deıin 128 mektepti jańǵyrtý josparlanǵan», dep málimdedi Tilekqabyl Baıdoshev.