Bıyl qurylys-montaj jumystarymen 11 myń shaqyrymdaı avtojol qamtylady. Bul týraly jáne 2023 jylǵa belgilengen josparlar jóninde QR Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda QR IIDM Avtomobıl joldary komıteti tóraǵasynyń orynbasary Amangeldi Bekov aıtyp berdi, dep habarlaıdy Egemen.kz.
Vedomstvo ókili naqtylaǵandaı, osy jyldyń sońyna qaraı normatıvtik jaǵdaıdaǵy joldardyń úlesi respýblıkalyq jeli boıynsha 92%-ǵa jáne jergilikti jelige sáıkes 87%-ǵa deıin artady dep kózdelip otyr.
«Respýblıkalyq jelige baılanysty 3,6 myń shaqyrym jolda qurylys jáne jańǵyrtý jumystary júrgizilip, onyń 856 shaqyrymyn aıaqtaımyz. Kúrdeli jáne ortasha jóndeýmen shamamen 3,4 myń shaqyrym jol qamtylady. Jergilikti mańyzdaǵy avtojoldarǵa toqtalsaq, jóndeýdiń barlyq túrimen 4 myń shaqyrym jol qamtylady dep josparlanǵan», dedi A.Bekov.
Sondaı-aq brıfıngte Memleket basshysynyń tapsyrmasyna sáıkes avtojol salasyn reformalaý boıynsha qolǵa alynǵan negizgi jumystar týraly da aıtyldy. Atap aıtqanda, FIDIC qaǵıdattaryn engizý men EPCM-kelisimsharttaryna kóshý. Máselen, EPCM-kelisimshartynyń talabyboıynsha bir oryndaýshy jobanyń tolyq sıklin júzege asyratynyn atap ótken jón. Bul oraıda jobany iske asyratyn merdiger barlyq táýekeldi óz jaýapkershiligine alatynyn aıta keteıik.
Budan bólek baspasóz jıynynda Jol aktıvteriniń ulttyq sapa ortalyǵymen jergilikti joldardyń sapasyn saraptaý jónindegi biryńǵaı shart qabyldanatyny belgili boldy. Bul elimizdegi avtojol jobalarynda qurylys tehnologııasyn saqtaı otyryp, paıdalanylatyn materıaldardyń sapasyn jáne merdigerlik uıymdardyń tártibin kúsheıtýge septigin tıgizedi.
Sonymen qatar jol salasyndaǵy normatıvtik-tehnıkalyq bazany jetildirý máselesi de kóterildi. Aıtalyq, qoldanystaǵy standarttar 50 negizgi GOST pen talaptarǵa ońtaılandyrylyp, jańartylmaq. Osy arqyly synalyp, dáleldengenmaterıaldar men tehnologııalar tizilimi jańǵyrtylady.