Respýblıkalyq mańyzy bar avtomobıl joldarynyń aqyly ýchaskelerinde ornatylǵan kameralar jyldamdyq shegin bekitý úshin paıdalanylmaq. Bul týraly búgin OKQ-da ótken brıfıngte Indýstrııa jáne ınfraqurylymdyq damý mınıstrligi Avtomobıl joldary komıteti tóraǵasynyń orynbasary Amangeldi Bekov aıtty, dep habarlaıdy Egemen.kz.
Bekovtyń aıtýynsha, búginde elde 2200 shaqyrym aqyly jol bar, olarǵa aqsha jınaýdy qamtamasyz etý úshin arnaıy kameralar ornatylǵan.
«Endi jyldamdyqty ólsheý úshin osy kameralardy qoldanýdy josparlap otyrmyz. Biz olardy Ishki ister mınıstrliginiń júıesi arqyly qosqymyz keledi jáne olar qozǵalystaǵy kólikterdiń jyldamdyǵyn jiberedi», dedi sheneýnik.
Bekovtyń aıtýynsha, búginde kameralar Astana-Býrabaı tasjolynda jyldamdyqty shamadan tys asyryp jatqanyn tirkep, júrgizýshilerge aıyppuldar túsip jatyr. 2030 jylǵa deıin jyldamdyqty buzý avtomatty túrde tirkeletin respýblıkalyq mańyzy bar 11 myń shaqyrym joldy aqyly etý josparlanǵan.