«Bolashaq» korporatıvtik qory Dúnıejúzilik aýtızm máselesi týraly aqparatty taratý kúnine arnalǵan «Autism Talks: erekshe balaly ata-analardyń shabyttandyrar áńgimeleri» taqyrybynda kezdesý ótkizedi, dep habarlaıdy Egemen.kz.
TED TALK formatynda aýtızmi bar balalardyń ata-analary óz tájirıbelerimen, balalardy tárbıeleý boıynsha keńesterimen, basqa da usynystarymen bólisedi.
Sonymen qatar sıblıngter – erekshe balalardyń baýyrlary sóz sóılep, erekshe týystarymen qarym-qatynas qurý tájirıbesimen, aýtızm jáne damýynda basqa da erekshelikteri bar balamen bir otbasynda tárbıe alý erekshelikteri jaıly áńgime órbitedi. Sondaı-aq is-sharaǵa psıhoterapevter, psıhıatrlar, minez-qulyq taldaýshylary jáne basqa da mamandar qatysady dep josparlanyp otyr. Is-shara erekshe balalardy tárbıelep otyrǵan otbasy músheleri úshin de, erekshe balalarmen jumys isteıtin mamandar úshin de paıdaly bolmaq.
Jıynǵa «Autism. Qol jetimdi orta» qaıyrymdylyq qorynyń jáne «Qamqor Áke» aýtızm bar balalardyń ákeler qoǵamdastyǵynyń basshylary, aqtóbelik erli-zaıypty Rýslan men Sara Qazybaevtar, «Erekshe baqyt» qoǵamdyq qorynyń teń quryltaıshysy, zań ǵylymdarynyń magıstri Svetlana Ordabaı, balalar psıhıatry Tatıana Degtıar, minez-qulyq taldaýshysy, «Bolashaq» qorynyń kýratory Aınur Nurova, sondaı-aq «Bolashaq» qorynyń Qamqorshylyq keńesiniń tóraıymy Dınara Gaplan qatysady.
Aıta ketsek, 2 sáýir – Dúnıejúzilik aýtızm máselesi týraly aqparatty taratý kúni. Bul kún 2007 jylǵy jeltoqsanda BUU Bas Assambleıasynyń qararymen belgilendi, onda aýtızmi bar balalardyń sany artqanyna alańdaýshylyq bildirildi. Resmı derekter boıynsha Qazaqstanda 9 myńǵa jýyq aýtızmge shaldyqqan bala turady, al beıresmı derekter boıynsha aýtızmi bar balalardyń sany 30 myńnan asady. «Autism Speaks» halyqaralyq uıymynyń derekteri boıynsha 2020 jyly álemdegi árbir 54-balaǵa aýtızm dıagnozy qoıylady.