Prezıdent bıyl qysta keıbir aımaqtardyń jylýsyz qalǵanyn aıtyp, energetıka ınfraqurylymy jumysyn synǵa aldy, dep habarlaıdy Egemen.kz.
«Infraqurylymdy damytýǵa qatysty ustanymdardy qaıta qaraý qajet. Bıylǵy qystyń qalaı ótkenin barshańyz bilesizder. Qystyń kózi qyraýda birqatar aımaqta qalalar men eldi mekender jylýsyz qaldy. Ábden tozǵan energetıka ınfraqurylymy áreń jumys istep tur», dedi Q. Toqaev.
Memleket basshysy bul máseleni baqylaýǵa alyp, arnaıy tapsyrma bergenin aıtty. Sonymen qatar Májiliske usynylǵan zań jobalaryn tez arada qaraýdy tapsyrdy.
«Meniń tapsyrmammen elektr energetıkasy naryǵyn damytýdyń jańa úlgisi daıyndalyp jatyr. Sol arqyly osy salaǵa qosymsha ınvestısııa tartý kózdelip otyr. Sondaı-aq bul qujat osy salanyń barynsha ashyq bolýyn qamtamasyz etpek. Qazir Májilistiń qaraýynda elektr energetıkasyna qatysty úsh zań jobasy jatyr. Depýtattyq korpýs zańnamadaǵy tıisti ózgertýlerdi shuǵyl túrde qarap, qabyldaýǵa tıis. Kommýnaldyq jelilerdiń ábden tozý saldarynan barlyq óńirde derlik qaıta-qaıta apat bolyp jatyr. Kóptegen qalada jol, elektr taratý jelisi, gaz qubyry sekildi negizgi ınfraqurylymdardyń tapshylyǵy qatty baıqalady. Biz elimizdiń ınfraqurylymdyq qýatyn qalyptastyrýymyz qajet. Sondyqtan men Ulttyq ınfraqurylym josparyn qabyldaýdy usynamyn. Qujatta osy saladaǵy basty máseleler ashyq kórsetilýge tıis. Sonymen birge 2029 jylǵa deıin iske asyrylatyn negizgi jobalar qamtylýy qajet», dedi Prezıdent.