Parlament Májilisine 6 partııa óz depýtattarynyń tizimi usyndy. Tizimnen elimizge belgili biraz azamatty kórýge bolady. Eń bastysy, barlyq partııa 30 paıyz jastarǵa berilgen kvotany durys paıdalanǵan. Partııalardan usynylǵan depýtattardyń basym bóligi – jastar.
Máselen, «Respublica» partııasynyń 50 paıyzy jastar, 6 depýtattyń 3-eýi jas depýtat. Bul – «Jańa Qazaqstan» dep atalǵan dáýirdegi jańa saılaý. Soǵan saı ózindik erekshelikteri de boldy. Bıylǵy saılaýda partııalardyń jastarǵa kóp kóńil bólip, olardyń pikirimen keńesip jatqany qýantady.
Saılaý aldynda uıymdastyrylǵan teledebat ta buryn-sońdy bolmaǵan joǵary dárejede ótti. Sol kezde-aq birneshe adam óziniń ótkir pikirimen kózge túsken edi. Naqtyraq aıtqanda, «Respublica» partııasynan Dınara Shúkijanovanyń oı-tolǵaýy unady. Sonymen qatar «Amanat» partııasynan Ashat Aımaǵambetov sekildi azamattarymyzdyń qatarǵa qaıta qosylǵanyn kópshilik kútti deýge bolady. Qazaqstan halyq partııasynan Irına Smırnova da Májilis depýtaty boldy. Bul saılaýdan jańa lep pen ózgeristi kóp baıqap otyrmyz.
Sondaı-aq depýtattardyń jas ereksheligine ǵana emes, múmkindigine de eshqandaı shekteý qoıylmady. Shetelde múmkindigi shekteýi jandar ózgelermen teń ómir súredi. Olardy kez kelgen ortadan kórýge bolady. Múgedektigi bar azamattarǵa barlyq qolaıly jaǵdaı jasalǵan. Bizdiń elde de osy baǵytqa qaraı bet túzep keledi. Ol úshin eń aldymen Májiliske múmkindigi shekteýli jandardyń muń-muqtajyn túsinetin azamat kelip, ortany ózgertýge áser etýi kerek. Erekshe jandardyń bılikte otyrǵanyn jáne ózderine qatysty másele jóninde sheshim qabyldaı bilgenin durys dep esepteımin. Jańa partııalar óz elektoratynyń senimin aqtap, qoǵam talabyndaǵy ózekti máseleler sheshimin tabatynyna senim mol.
Ásem QAIDAROVA,
Qazaqstan qoǵamdyq damý ınstıtýty
basqarma tóraǵasynyń orynbasary