Zańger Lázzat Ahatova Ánurandy elemegen jýrnalıske qatysty pikir bildirdi. Zańgerdiń aıtýynsha, jýrnalısti ákimshilik jazaǵa tartýǵa ábden bolady, dep habarlaıdy Egemen.kz.
Ánuran aıtylǵan kezde ornynan turmaǵan jýrnalıstiń isin jurt qyzý talqylap jatyr. Biri «ondaı-ondaı bolyp turady» dep aqtasa, ekinshi tarap Ánuranǵa qurmet kórsetpegenin synǵa alyp jatyr. Áleýmettik jelide taraǵan vıdeoda «Vlast» aqparattyq agenttiginiń jýrnalısi Tamara Vaal Ánuran shyrqalǵan kezde ornynan turmastan jumys istep otyra bergen.
Bul jaǵdaıdan keıin «Vlast» aqparattyq agenttigi telegram arnasynda qyzmetkeriniń áreketi úshin keshirim surap, jazba qaldyrdy.
Parlamenttegi vıdeoǵa qatysty Tamara Vaal ózi de pikir bildirdi. Jýrnalıst aǵynan jarylyp, kásibı mindetin alǵa tartqan.
«Parlament qabyrǵasynda bolyp jatqan mańyzdy jaıttardy halyqqa barynsha tez ári ashyq jetkizý júktelgen. Bizdiń jumysymyzdyń ereksheligi de osynda, biz naqty ýaqytta bolyp jatqan barlyq nárseni mátin túrinde berýimiz tıis. Memlekettik Ánuran oryndalyp jatqanda operatorlar men fotograftar zaldy aralap, túsirip jatqany sııaqty sharýa bul», deıdi jýrnalıst.
Bul jaǵdaıǵa qatysty zańger Lázzat Ahatova da pikir bildirdi.
«QR Rámizder týraly zańynyń 9-babynyń birinshi tarmaǵynda Memlekettik Gımn kópshilik aldynda oryndalǵan kezde qatysýshylar ony ornynan turyp aıtady (tyńdaıdy), bul rette Qazaqstan Respýblıkasynyń azamattary oń qolyn júrek tusyna qoıady delingen. Iаǵnı Ánurandy oryndaýǵa qatysty zań talaby bar. Bul QR azamatynyń bárine birdeı mindet. Alaıda zańda dál Ánuran oryndalǵanda turmaǵany úshin jazalanady dep naqtylanǵan sóz joq. Biraq QR Qylmystyq Kodeksi 372-baby, Memlekettik rámizderdi qorlaý týraly zańy bar. Ol zańǵa sáıkes «Qazaqstan Respýblıkasynyń memlekettik rámizderin qorlaý – úsh myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne toǵyz júz saǵatqa deıingi merzimge qoǵamdyq jumystarǵa tartýǵa ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady», delingen.
Zańda eger dál sol is-áreketke qatysty zań bolmasa soǵan uqsas zań qoldanylady degen de normatıv bar. Qylmystyq kodekstiń jazasy qatańdaý. Degenmen rámizderge qatysty zańdy paıdalanyp, normatıv boıynsha jýrnalısti ákimshilik jazaǵa tartýǵa bolady.
«Biraq bolashaqta dál Ánuranǵa, ıaǵnı osyndaı jaǵdaılarǵa qatysty zań qabyldanýy da múmkin. Zań degen solaı ózgerip, tolyǵyp, kerek emesi alynyp tastalyp otyratyn dúnıe. Sondyqtan bundaı jaǵdaıda ákimshilik jazany qoldaný kerek», dedi zańger.