Nurlan Jaqypov «Samuryq-Qazyna» qorynyń basqarma tóraǵasy bolyp taǵaıyndaldy, dep habarlaıdy Egemen.kz Úkimettiń baspasóz qyzmetine silteme jasap.
QR Premer-mınıstri Álıhan Smaıylov «Samuryq-Qazyna» ulttyq ál-aýqat qory» AQ ujymyna jańa basqarma tóraǵasyn – Nurlan Jaqypovty tanystyrdy.
Úkimet basshysy qordyń aldynda ınvestısııalar tartý, energetıkalyq keshendi damytý, respýblıkanyń ınfraqurylymdyq, kólik-logıstıkalyq jáne ındýstrııalyq damýyn qamtamasyz etý boıynsha aýqymdy mindetter turǵanyn atap ótti.
Sonymen qatar qor otandyq taýar óndirýshilerge belsendi túrde qoldaý kórsetip, qolaıly jaǵdaı jasaýǵa tıis. Bul ulttyq ekonomıkanyń ornyqty damý jolynda nyǵaıýyna múmkindik beredi.
«Árbir enshiles kompanııa men holdıng jumysynyń basym baǵyttary jáne KPI aıqyndalǵan, perspektıvaly mindetter túsinikti. Qor – bizdiń elimizde úlken aktıvterdi basqaratyn óte mańyzdy qurylym. Qordyń tıimdi jumysyna kóp másele, ásirese, búkil ekonomıkaǵa jáne elimizdiń odan ári damýyna áser etetin iri jobalar baılanysty bolyp otyr», dedi Álıhan Smaıylov.
Sondaı-aq Úkimet basshysy Nurlan Jaqypov pen qordyń barlyq qyzmetkeriniń jumystaryna tabys tiledi. Sonymen qatar Premer-mınıstr sońǵy eki jylda qordy basqarǵan Almasadam Sátqalıevke Qazaqstan ekonomıkasynyń damýyna qosqan úlesi úshin alǵysyn bildirdi.