Elimizde qyzylsha juqtyrǵandar sany artty. Jyl basynan beri respýblıka boıynsha 200-ge jýyq adamnan osy ınfeksııa anyqtalǵan. Olardyń 100-i 14 jasqa tolmaǵan balalar, dep habarlaıdy Egemen.kz qazaqstan.tv. arnasyna silteme jasap.
Osyny eskergen mamandar aldyn ala dabyl qaǵýda. Ásirese, indet Almatyda órship tur.
Almatyda qyzylshaǵa qarsy saqtyq sharalary kúsheıe bastady. Dárigerler mektep, balabaqshalarǵa eskertý jasap, sanıtarlyq talapty saqtaýǵa shaqyryp jatyr.
Sebebi indet juqtyrǵandar artyp, 73 adamnan qyzylsha taıaqshalary anyqtalǵan.
«Qyzylsha taıaqshalary anyqtalǵan naýqastardyń 67-si 14 jasqa tolmaǵan. Qazir qalada 26 adam aýrýhanada em qabyldap jatyr. Olardyń altaýy bala. Barlyǵynyń jaǵdaıy ortasha», deıdi qalalyq qoǵamdyq densaýlyq saqtaý basqarmasy basshysynyń orynbasary Nazgúl Imanǵalıeva.
Byltyr respýblıka kóleminde qyzylsha juqtyrǵan 4 jaǵdaı ǵana tirkelgen. Soǵan qaramastan ótken jyly 350 myńdaı bala osy indetke qarsy ekpe aldy.
«Qyzylsha vırýsyna qarsy eshqandaı arnaıy em joq. 18 jasqa deıingi balalardyń arasynda qyzylshaǵa qarsy egý mártebesin tekserý jumystary júrip jatyr. Búgingi kúnge deıin egilmegen adamdardyń sany – 94 myńnan asyp otyr», dedi DSM Sanıtarııalyq-epıdemıologııalyq baqylaý komıtetiniń basqarma basshysy Nurshaı Ázimbaeva.
Mamandar qyzylshadan qorǵanýdyń birden-bir joly – ekpe alý deıdi. Sebebi vaksına alǵan balalarda aýrý jeńil ótip, tez jazylǵan. Dárigerler aýa arqyly taralatyn juqpaly vırýstyń negizgi belgilerin atap ótti.
«Kataralyq sımptomdar paıda bolady. Dene qyzýy kóteriledi. Sol kezderde balabaqshaǵa, mektepke aparmaýlaryn suraımyz. О́ıtkeni qyzylsha aýrýynyń kóbine denesine bórtpe shyqqan kezde ǵana mán beredi. Sol sebepti kesh anyqtalyp jatady», dedi qalalyq sanıtarııalyq-epıdemıologııalyq baqylaý departamentiniń bólim basshysy Almash Ahmetova.
Qyzylsha – dene qyzýynyń kóterilýi, jótel, murynnan sý aǵý, jáne bórtpe túrinde kórinetin vırýstyq aýrý. Aýa arqyly taraıdy. Infeksııany odan ary órshitpeý maqsatynda almatylyq dárigerler naýqastarmen qarym-qatynasta bolǵan turǵyndardy jiti qarap, medısınalyq baqylaýǵa alǵan.