Astana qalasynda 2023 jyldyń 8 sáýirinen 6 mamyryna deıin sanıtarlyq tazalaý, abattandyrý jáne kógaldandyrý boıynsha «Jasyl Astana» kóktemgi ekologııalyq aılyǵy ótedi, dep habarlaıdy Egemen.kz elorda ákimdiginiń resmı saıtyna silteme jasap.
Al turǵyndardyń, bıznes ókilderiniń, memlekettik jáne basqa da organdardyń qatysýymen jappaı jalpyqalalyq senbilikter 15 sáýir men 6 mamyrda ótedi.
Ekologııalyq aılyq aıasynda qalany, nóser jáne káriz jelilerin sanıtarlyq tazartý, kóshelerdi, trotýarlar men kvartalishilik aýmaqtardy tazalaý, saıabaqtar men gúlzarlardaǵy jasyl jelekterdi kútý boıynsha maýsymdyq agrotehnıkalyq jumystar, saýda nysandaryna irgeles aýmaqtardy jınaý, kógaldar men gúlzarlar alańdaryn ornatý jónindegi is-sharalar, ruqsat etilmegen qoqys úıindileri men lastanǵan ýchaskelerdi joıý jumysy júrgiziledi.
Sonymen qatar «Jasyl Astana» aksııasy aıasynda 10 myńnan astam jasyl jelek otyrǵyzý josparlanyp otyr.
«Qala kásiporyndaryn, MIB (PIK), shaǵyn jáne orta bıznes sýbektilerin (bazarlar, saýda oıyn-saýyq ortalyqtary jáne basqalar), oqý oryndaryn, eriktiler men belsendi qala turǵyndaryn ekologııalyq aılyqqa qatysýǵa shaqyramyz», delingen habarlamada.
Aıta keteıik, 2022 jyly ekologııalyq senbilikter aıasynda barlyǵy 6 myń tonnadan astam qoqys shyǵarylǵan. Sol sııaqty 29 myńnan astam aǵash otyrǵyzylyp, 2,7 mln sharshy metr alań jınaldy. Ekologııalyq aksııa asynda 266 067 adam qamtylǵan bolatyn.