Astana qalasynda tabıǵı órtterge qarsy is-sharalar jospary bekitildi. Bul týraly memlekettik órt baqylaý basqarmasynyń bastyǵy habarlady, dep jazady Egemen.kz.
Elordadaǵy órt máselesi Astana qalalyq kommýnıkasııalar qyzmeti alańynda ótken baspasóz máslıhatynda kóterildi. Spıkerdiń aıtýynsha, ótken jyly qurǵaq shóp pen qamystyń órtenýi boıynsha 313 oqıǵa tirkelgen.
«Bir aptanyń ishinde 1 500 sharshy metrden asatyn aýmaqta qurǵaq shóp pen qamystyń órtenýi boıynsha 6 oqıǵa tirkeldi. О́tken jyly 313 jaǵdaı tirkelgen edi. Orman jáne dala órtteriniń aldyn alý maqsatynda bıyl elorda aýmaǵynda tabıǵı órtke qarsy is-sharalar jospary ázirlendi. Qala shekarasynyń perımetrinde 6 baǵyt boıynsha jyljymaly kúzet beketteri ashyldy», dedi Erkin Otarymǵalıuly.
Osy oraıda órt baqylaý basqarmasynyń bastyǵy qaýipsizdik erejelerin nazardan tys qaldyrmaýdyń mańyzdylyǵyna toqtala ketti:
kez kelgen ashyq ot kózimen jumys istegende saq bolyńyz; jeke ornalasqan turǵyn úı mańyndaǵy aýmaqtardy ýaqytyly tazalap turý kerek; tabıǵat aıasyna shyqqanda sirińkeni abaılap qoldanyp, temeki qaldyǵyn tastamaý kerek; balalardyń sirińke jáne otpen oınaýyna jol bermeńizder; ań aýlaý kezinde janatyn materıaldardy qoldanbaý qajet; ǵımarattardyń janynda ot jáne qoqys jaǵýǵa bolmaıdy; tabıǵat aıasyna demalysqa shyqqanda jaqqan jalyndy tolyq sóndirip ketý kerek. Sebebi shala sóngen ot órtke ákelýi múmkin; shyny ydysty jáne synǵan áınekti qaldyrmańyzdar. О́rt bastalǵan jaǵdaıda bolsa sýmen, aǵashtyń butaǵymen nemese qum sebý arqyly sóndirýge tyrysý qajet.