Senat Spıkeri Máýlen Áshimbaevtyń tóraǵalyǵymen Palata otyrysy ótti. Onda senatorlar Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyqpen kelisimdi ratıfıkasııalaý týraly máseleni qarady, dep habarlaıdy Egemen.kz.
Palata otyrysyn ashqan Máýlen Áshimbaev Memleket basshysy belgilep bergen mindetterdi oryndaý aıasynda jańarǵan Parlament jumysynyń negizgi basymdyqtaryna nazar aýdardy.
Sonymen qatar Senat Tóraǵasy zań shyǵarý qyzmetinde jańa tásilderdi qoldanýdyń jáne múddeli organdarmen, sarapshylarmen, óńirlerdegi belsendi azamattarmen tyǵyz baılanys ornatýdyń mańyzdy ekenin aıtty. Palata Spıkeriniń aıtýynsha, mundaı jumys formaty ázirlenip jatqan qujattardy jan-jaqty taldaýǵa jáne olardyń sapasyn arttyrýǵa yqpal etedi.
«Zańdardy qaraý kezinde talqylaý prosesterin barynsha ashyq, ınklıýzıvti, jarııa túrde ótkizýimiz kerek. Mundaı qadam Parlamenttiń ashyqtyǵyn arttyrýǵa septigin tıgizedi. Senat jumysynda óńirlerdiń jáne shalǵaı aýyldardyń turǵyndaryn alańdatqan máseleler, sondaı-aq senatorlarmen kezdesýler kezinde kóterilgen problemalar eskerilýge tıis. Bul – bizdiń negizgi mindetimiz», dedi Máýlen Áshimbaev.
Otyrys barysynda senatorlar «Qazaqstan Respýblıkasynyń Úkimeti men Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyq arasyndaǵy Qazaqstan Respýblıkasynyń aýmaǵynda onyń bolý sharttary týraly kelisimdi ratıfıkasııalaý týraly» zańdy qarap, maquldady.
Kelisim tótenshe jaǵdaılar salasyndaǵy yntymaqtastyqty júzege asyrý úshin qurylǵan arnaıy Ortalyqtyń qyzmetin retteýge baǵyttalǵan. Naqty aıtqanda, bul qujat Halyqaralyq uıymnyń Qazaqstan aýmaǵyndaǵy qyzmet sharttaryn aıqyndaıdy. Zańdy talqylaý kezinde atalǵan Kelisim tótenshe jaǵdaılardyń aldyn alýǵa jáne osy baǵyttaǵy halyqaralyq yntymaqtastyqty nyǵaıtýǵa oń áserin tıgizýi kerektigi aıtyldy.