Astanada Prezıdent ákimshiliginiń jáne qalalyq máslıhat depýtattarynyń kelisimi boıynsha eki aýdannyń ákimderi taǵaıyndaldy. Nura aýdanynyń ákimi qyzmetine Júsip Jumaǵulov, al Saryarqa aýdanynyń ákimi bolyp Baýyrjan Eraly taǵaıyndaldy, dep habarlaıdy Egemen.kz qala ákimdiginiń baspasóz qyzmetine silteme jasap.
Júsip Jumaǵulov – Prezıdenttik jastar kadr rezerviniń múshesi. Eńbek jolyn elordanyń Investısııalar jáne damý basqarmasynyń mamany laýazymynan bastaǵan. 2016 jyldan 2019 jylǵa deıin «Din problemalaryn zertteý ortalyǵy» KMM basshysynyń orynbasary, elordanyń Qoǵamdyq damý isteri basqarmasy basshysynyń orynbasary qyzmetterin atqardy. 2020 jyldan bastap elorda ákimi apparaty basshysynyń orynbasary bolyp eńbek etti. 2022 jyldyń aqpan aıynan bastap Saryarqa aýdanynyń ákimi qyzmetin atqardy.
Baýyrjan Eraly eńbek jolyn Qarjy mınıstrligi Memlekettik kirister komıtetiniń ınspektory laýazymynan bastaǵan. Ár jyldary sarapshy, «Ahýaldyq ortalyq» basqarmasynyń bas sarapshysy, «Elektrondyq deklarasııalaý ortalyǵy» basqarmasy basshysynyń orynbasary m.a. laýazymdaryn atqardy. 2022 jyly «Qarjy mınıstrligi MKK bas dıspetcherlik basqarmasy» RMM basshysynyń orynbasary bolyp eńbek etti. Taǵaıyndalǵanǵa deıin elorda ákiminiń keńesshisi qyzmetin atqardy.
Memleket basshysynyń tapsyrmalary aıasynda aýdan ákimderine aýdandar men eldi mekenderdi damytý boıynsha birqatar mindet qoıyldy.