2023 jylǵy pitir sadaqa somasy – 535 teńge, al pidııa mólsheri – 3 myń teńgeni quraıdy, dep habarlaıdy Egemen.kz informburo.kz saıtyna silteme jasap.
Pitir sadaqasy
Ramazan aıynda jańa týǵan sábıden qartqa deıin jaǵdaıy keletin árbir musylman pitir sadaqasyn beredi. 2023 jylǵy Ramazan aıyndaǵy bir adam úshin beriletin pitir sadaqa mólsheri 2 keli unnyń naryqtyq ortasha baǵasymen eseptelip, 535 teńge etip belgilendi. Pitir sadaqasyn qurma, meıiz, arpa baǵasymen de berýge bolady:
Bıdaı (2 kg) – 340 teńge; Un (2 kg) – 535 teńge; Arpa (4 kg) – 520 teńge; Meıiz (2 kg) – 4270 teńge; Qurma (4 kg) – 8090 teńge.«Qazirgi tańda bıdaıdyń ózi emes, un, talqan sekildi onyń ónimderi keń qoldanylady. Sol sebepti Qazaqstan musylmandary dinı basqarmasy pitir sadaqanyń qunyn unmen esepteýdi negizge alady. О́ıtkeni, sharıǵatta bıdaımen qatar onyń ónimderimen de pitir sadaqa berýge ruqsat etiledi», dedi QMDB tóraǵa orynbasary Sansyzbaı Shoqanov.
Al baı, aýqatty adamdar pitir sadaqany 2 keli meıizben (4270 teńge) nemese 4 keli qurmamen (8090 teńge) bergeni abzal. Qaıtys bolǵan adamdarǵa, ana qursaǵyndaǵy balaǵa pitir sadaqa berilmeıdi.
Ramazan aıynyń pitir sadaqasyn Qadir túninen buryn nemese keıin bersin degen ereje joq. Degenmen pitir sadaqany oraza bastalǵannan aıt namazyna deıin bergen jón. Odan keıin berilgen pitir sadaqa jáı sadaqa bolyp qalady.
«Meshitke túsken qarajat múftııat bekitken arnaıy jarǵy negizinde jumsalady. Qarajat qaıyrymdylyqqa jumsalady. Ramazan aıyndaǵy pitir sadaqasy meshit tizimine tirkelgen kómekke muqtaj otbasylarǵa, jetimderge, jalǵyzbasty analarǵa arnaıy tekserý komıssııasynyń sheshimimen zattaı nemese qarjylaı beriledi», delingen QMDB málimdemesinde.
Pitir sadaqany meshitte ǵana emes, Kaspi.kz, Halyk Homebank, Fortebank, Bank Sentrkredıt, Astana-plat, Bereke Bank mobıldi qosymshalary arqyly tóleýge bolady.
Pidııa
Islam dininde buıyrylǵan belgili bir qulshylyqtyń ornyna tólem jasaýdy «pidııa» dep ataıdy.
Densaýlyǵyna baılanysty ýaqytsha oraza ustaı almaǵan adam qaryz kúnderin Ramazan aıynan keıin óteıdi. Al týberkýlez, qaterli isik, qant dıabeti, asqazan jarasy, tynys jáne júrek demikpesi sekildi aýrýǵa shaldyǵyp, saýyǵýdan kúder úzgen naýqastar jáne jasy úlken egde adamdar aýyz bekitýge shamasy kelmese, oraza ustamaıdy. Mundaı adamdar Ramazan aıynda ustamaǵan orazasy úshin qaza bolǵan ár kúnge pidııa beredi.
«Pidııa mólsheri – bir adamnyń kúndelikti (tańǵy jáne keshki) toıyp ishetin asy. Onyń bıylǵy mólsheri 3 myń teńge bolyp bekitildi. Buǵan shamasy kelmegender orazanyń ár kúnine pitir sadaqasynyń qunyn beredi. Oǵan da jaǵdaıy bolmasa, tólemnen bosatylyp, Alla Taǵaladan keshirim tileıdi», dedi QMDB tóraǵa orynbasary Sansyzbaı Shoqanov.
Pidııa retinde bir jarlynyń bir kúndik eki mezgil tamaǵyn nemese sonyń qunyn aqshalaı berýine bolady. Pidııa kedeılerge, turmystyq jaǵdaıy tómen adamdarǵa, háli nashar jandarǵa úlestiriledi. Ony Ramazan aıynyń basynda nemese sońynda berýge bolady jáne birneshe kúnniń pidııasyn bir adamǵa nemese birneshe adamǵa bólip bere alady.
Pidııa bergen naýqas aýrýynan aıyǵyp ketse, dármensiz adam kúsh alsa bergen pidııasy joıylady. Olar burynǵy orazalardyń qazasyn óteıdi.
«Qaıtys bolǵan adamnyń ornyna oraza ustaýǵa bolmaıdy. Ustaǵan oraza marqumnyń tiri kezinde ustamaı ketken orazasynyń ornyn toltyrmaıdy. Alaıda árbir kúni úshin pidııa berip turýǵa bolady. Tiri kezinde sebepsiz ustamaǵan kúnderine oraı eseptep, shyqqan somany marqumnyń atynan qaza orazalarynyń pidııasy retinde bir muqtaj adamǵa berýge bolady», delingen QMDB saıtynda.