2023 jyldyń 27-28 sáýir kúnderi Astana qalasynda «Ashyq úkimet jáne jańa basqarý mádenıeti: estý, túsiný, áreket etý» taqyrybynda halyqaralyq ǵylymı-praktıkalyq konferensııa ótedi, dep habarlaıdy Egemen.kz.
Halyqaralyq sharany Qazaqstan Respýblıkasy Prezıdentiniń janyndaǵy Memlekettik basqarý akademııasy Qazaqstan Respýbıkasy Memlekettik qyzmet isteri agenttiginiń bastamasymen jáne Astana memlekettik qyzmet habynyń qoldaýymen uıymdastyrady.
Konferensııa memlekettik basqarý júıesin jańǵyrtýdyń, servıstik memlekettik apparatty, jańa saıası mádenıetti, azamattardyń, úkimettik emes uıymdardyń, bıznes-qoǵamdastyq pen memlekettiń áriptestigi men ózara jaýapkershiligi ıdeologııasyn qalyptastyrýdyń teorııalyq jáne praktıkalyq aspektilerine arnalǵan.
Akademııa rektory Erlan Ábildiń aıtýynsha, ǵylymı is-shara túrli zertteý baǵyttary boıynsha ótedi.
«Konferensııa úsh zertteý baǵytyna saı ótedi: «Ashyq úkimet», «Jańa basqarý mádenıeti», «Ashyq dıalog jáne áleýmettik áriptestik». Shara barysynda «Ashyq úkimetti» engizýdiń halyqaralyq jáne ulttyq tájirıbeleri, «Sıfrlyq memleket» úlgisin qalyptastyrýdyń negizgi aspektileri, memlekettik basqarýdy bıýrokratııadan aryltý máseleleri talqylanady. Sonymen qatar memlekettik basqarýdy reformalaý aıasynda memlekettik qyzmetshi bolmysynyń ózgerýi jáne memlekettiń, bıznestiń jáne úkimettik emes uıymdardyń strategııalyq áriptestigi sııaqty mańyzdy taqyryptar talqyǵa salynady», dedi rektor.
Konferensııanyń maqsaty – memlekettik basqarýdyń ózekti máselelerin talqylaý jáne praktıkalyq usynystar ázirleý. Sharaǵa otandyq jáne sheteldik sarapshylar qaýymdastyǵy, ǵalymdar, zertteýshiler, sonyń ishinde Akademııanyń magıstranttary men doktoranttary, memlekettik organdardyń, bıznes qurylymdardyń jáne azamattyq qoǵam ınstıtýttarynyń ókilderi qatysady.