Memleket basshysy Mańǵystaý oblysynyń ákimi Nurlan Noǵaevtyń baıandamasyna qatysty pikir bildirdi, dep habarlaıdy Egemen.kz Aqordanyń baspasóz qyzmetine silteme jasap.
«Jańaózende bolǵan jarylystyń saldaryn joıý jumystaryn tez arada bitirý qajet. Jalpy, Jańaózen – munaı-gaz salasyna ǵana qarap otyrǵan monoqala. Sol sebepti, biz ony damytý úshin arnaıy keshendi jospar qabyldadyq. Osy qujatty meılinshe júzege asyrý kerek. Úkimet te bul jumysqa jaýapty bolady.
Batysta, ásirese, Mańǵystaýda, jastar kóbine munaıshy bolǵysy keledi. Bul – durys emes. Munaı qory taýsylǵanda aımaqtaǵy ahýal tipti kúrdeli bolyp ketýi múmkin. Sondyqtan jastardyń basqa da kásipterdi ıgerýine jaǵdaı jasaýymyz kerek. Bul jumysty arnaıy jospar boıynsha atqarý qajet», dedi Memleket basshysy.
Osy rette ol Mańǵystaý oblysyn damytý isinde aqparattyq tehnologııalardy qoldanýǵa bolatynyn aıtyp ótti.
«Jalpy, biz kózi ashyq, bilimdi jastardy tárbıeleýimiz kerek. О́skeleń urpaq keleshekke senimmen qaraýy qajet. Bul úlken jumys. Bul ákimniń, Úkimettiń quzyrynda turaqty túrde bolý kerek», dedi Prezıdent.
Eske salaıyq, 17 sáýir kúni tańǵy bester shamasynda Jańaózendegi eki podezdi 12 páterli turǵyn úıde gaz ballony jarylǵan bolatyn. Bir kireberis qulaǵanda 11 adam zardap shekken edi.