Qasym-Jomart Toqaev ysyrapshyl bolýdy qoıyp, únemge kóship, árnárseniń qadirin bilý keregin aıtty, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy sońǵy kezderi qatty baıqalyp júrgen sý tapshylyǵy máselesine toqtaldy. Bul jaǵdaıda máseleni sheshýdiń jalǵyz joly únemdeý dedi.
− «Sýdyń da suraýy bar». Ony neǵurlym kóp tutynsań, soǵurlym kóp aqsha tóleısiń. Bul – jurtty únemshil bolýǵa úıretetin ádiletti jáne qarapaıym ustanym. Damyǵan elderdiń turǵyndary ár nárseniń qadirin biledi. Únemshildik olardyń ómir saltyna aınalǵan. Tipti, sý men jylýdy ysyrap etpeýdi balalarǵa jastaıynan úıretedi. Bizdiń azamattarymyz da osyndaı únemshil bolýy kerek. Ásirese, sýdy únemdep tutynýymyz kerek. Men sý tapshylyǵynyń artyp jatqanyn udaıy aıtyp júrmin. Sarapshylardyń paıymdaýynsha, 2040 jylǵa qaraı sýǵa degen suranys 50 paıyzǵa artady. Qazaqstan 2050 jylǵa qaraı «sýǵa óte muqtaj» elderdiń sanatyna kirýi múmkin, − dedi Prezıdent.
Onyń aıtýynsha, qazir elimizde 600 myńnan astam adam taza aýyzsýǵa zárý. Bul – aýyldaǵy aǵaıyn ǵana emes, qala halqy úshin de óte ózekti másele. Iri shaharlardyń ınfraqurylymy jyldan-jylǵa artyp kele jatqan suranysqa jaýap bere almaı otyr. Tipti, Astananyń ózinde sý tapshylyǵy qatty sezile bastady. Basty sebeptiń biri – qurylystyń kóbeıýi.
− Únemshil bolmasaq, taza sý beretin jańa nysandardy iske qosqanmen, tapshylyqty joıa almaımyz, – dedi Q. Toqaev.