Memleket basshysy bilim salasy sapaly bilim berýge emes, jalǵan kórsetkishterge jumys istep jatqandyǵyn aıtty, dep habarlaıdy Egemen.kz.
Qazirgi zamanda bilimge sensek qana damı alatynymyz anyq. Prezıdenttiń de qapy qalmaıyq deıtini sol. Degenmen bilim salasynda olqylyqtar óte kóp. Qasym-Jomart Toqaev bul salada kózboıaýshylyqtyń kóbeıgenin atap ótti.
«Qazirgi zamanda damýdyń basty kilti – bilim. Biz zaman talabyna barynsha beıim, sondaı-aq jarqyn bolashaqty óz qolymen qalaıtyn jasampaz urpaq tárbıeleýimiz kerek. PISA halyqaralyq zertteýine qarasaq, elimiz sońǵy 10 jylda orta bilim sapasy boıynsha 80 eldiń ishinde elýinshi-alpysynshy orynnan kóterilgen joq. Demek, jaǵdaıymyz máz emes. Basty túıtkildiń biri – balalardyń bilimin birjaqty baǵalaý. Elimizde bilimniń sapasyna emes, kórsetkishtiń joǵary bolýyna basa mán beriledi. Oqýshylardyń biryńǵaı ulttyq testileýden alǵan baǵasy men mekteptegi baǵasy eki túrli. Aıyrmashylyq 30 paıyz nemese odan da kóp bolýy múmkin. Sondaı-aq osyndaı alshaqtyq halyqaralyq jáne ulttyq baǵalaý kezinde baıqalady. Ashyǵyn aıtsaq, munyń bári jappaı beleń alǵan kózboıaýshylyqtyń kesirinen bolyp otyr. О́zińdi-óziń aldaý jarǵa jyǵady», dedi Prezıdent.