«Mahabbat, qyzyq mol jyldar» – Ázilhan Nurshaıyqovtyń oqyrmandar arasyndaǵy asa oqylymdy týyndysy. Biraq eń alǵash Erbol men Meńtaıdyń tragedııaǵa toly mahabbat hıkaıasyn Muqan Imanjanov «Esenovtiń taǵdyry» áńgimesine arqaý etken. Onyń shyǵarmasy 1955 jyly jarııalanǵan. Al Ázilhan Nurshaıyqovtyń romany 1970 jyly jaryq kórdi.
Á.Nurshaıyqov ol týraly óziniń M.Imanjanovqa arnap jazǵan estelik kitabynda aıtady. Kitapta ekeýara almasqan hattyń sońyndaǵy túsiniktemede: «M.Imanjanov óziniń «Esenovtiń taǵdyry» degen áńgimesin Á.Nurshaıyqov bergen sıýjetke negizdep jazǵan», deıdi. M.Imanjanovtyń Erboly – Esenov ǵashyǵyn umytý úshin fılologııadan medısınalyq ınstıtýtqa aýysqan hırýrg obrazynda beriledi. Meńtaıy – Bıǵaısha. Ekeýiniń qosylýyna kedergi bolǵan oqıǵalar áserli, qysqa baıandalady.
Biraq bul áńgime avtordyń kóńilinen shyqpaǵan. О́ziniń Ázilhan Nurshaıyqovqa jazǵan hatynda bylaı deıdi: «Aıtpaqshy, áńgimege bergen keńesińe kóp rahmet. Qazir jınaq daıyndap jatyrmyn. Pikirińdi sonda myqtap esepke alamyn. Adam alǵashynda onsha ańǵara bermeıdi ǵoı, ózi (sol áńgimeni aıtamyn) tipti nashar jazylypty. Endi oqyp, ózim qabaq shytyp otyrmyn. Biraq qazir kesh. Bir túrtip qalǵan soń, ony-muny jasaǵanyńmen, báribir myqty dúnıe bolmaıdy. Basynda izi myqtap salynbaǵan soń, qaraqshydan uzap kete almaısyń. Túgeldeı qaıta jazýǵa kóńil soqpaıdy».
Al Ázilhan Nurshaıyqov áńgime jarııalanǵannan keıin Muqan Imanjanovqa jazǵan hatynda: «Ekinshi qýantqan sizdiń áńgimeńiz boldy. Qyzyǵa, súısine oqydym. Bas alǵam joq. Orta tusyna kelgende áneýkúngi men aıtqan ǵashyqtyq negizine burylǵan ba dep oılap qalyp edim. О́ıtkeni sýretteý basynda men aıtqandaı elementter bar eken. Biraq men qyzdyń jaqsy ekenin basynda aıtyp edim. Munda qyz jaman emes, degenmen bul basqa plandaǵy qyz», dep jazady.
M.Imanjanovtyń «Esenovtiń taǵdyry» áńgimesi óte qysqa jazylǵandyqtan, Á.Nurshaıyqov ol sıýjetti keńeıtip, artynan belgili «Mahabbat, qyzyq mol jyldar» romanyn jazǵan.