28-30 sáýir kúnderi Astanada para dzıýdodan Azııa chempıonaty ótedi, dep habarlaıdy Egemen.kz Qazaqstan para dzıýdo federasııasynyń baspasóz qyzmetine silteme jasap.
Qurlyqtyq birinshilikke Azııanyń 11 elinen 80-nen astam tatamı sheberi qatysady. Atap aıtqanda, Astana tatamıinde Qazaqstan, О́zbekstan, Qyrǵyzstan, Japonııa, Mońǵolııa, Úndistan, Qytaılyq Taıpeı, Indonezııa, Iran, Ońtústik Koreıa jáne Taıland sportshylary baq synaıdy.
Atalǵan jarysta Qazaqstan ulttyq quramasynan J1 jáne J2 sanaty boıynsha 22 dzıýdoshy baq synaıdy.
«Azııa chempıonatyna daıyndyq tyńǵylyqty júrip jatyr. Qazirgi tańda qurama Almatyda jarys aldyndaǵy sońǵy qorytyndy jattyǵý jıynynda sheberlikterin shyńdaýda. Azııa chempıonatyna qatysatyn sportshylar qatarynda tájirıbeli balýandar da, jas sportshylar da bar.Qurlyqtyq báseke óz elimizde ótetin bolǵandyqtan jaýapkershilik óte joǵary. Sportshylarymyzdyń fızıkalyq, psıhologııalyq turǵydan jaǵdaılary jaqsy. Elordamyzda ótetin jarysta quramadaǵy árbir sportshy nátıjeli kúres kórsetedi, el namysyn abyroımen qorǵaıdy dep senemin», deıdi para dzıýdodan Qazaqstan quramasynyń bas bapkeri Jandos Qııanov.
Azııa chempıonaty Astana qalasyndaǵy Jaqsylyq Úshkempirov atyndaǵy jekpe-jek saraıynda ótedi.
Para dzıýdodan Azııa chempıonatyna qatysatyn Qazaqstan ulttyq quramasynyń tizimi kelesideı:
Áıelder
J2 -48 kg: Aqmaral Naýatbek;J1 -57 kg: Alfııa Tilekqabyl, Dılorom Dıhanova;J2 -57 kg: Daıana Fedosova;J1 -70 kg: Dınara Kýdjýlova; J2 -70 kg Dıana: Bólekova; J1 +70 kg: Záýre Aıtek.
Erler
J1 -60 kg: Murat Madınov, Temirbolat Tashekenov; J2 -60 kg: Anýar Sarıev;J1 -73 kg: Erǵalı Shameı, Asylan Nurdaýletov;J2 -73 kg: Oljas Orazalyluly, Azamat Nokýshev;J1 -90 kg: Abylaı Ádilbekov, Baýyrjan Arystanbekov;J2 -90 kg: Janbota Amanjol, Ǵalymjan Smaǵululy;J1 +90 kg: Erlan О́tepov, Baǵlan Ońalbek; J2 +90 kg: Erlan Konkıev, Talǵat Ajǵalıev.