Qazaqstanda shahmatty mektep baǵdarlamasyna fakýltatıvtik pán retinde engizý baǵdarlamasy ázirlenýde. Bolashaqta shahmatty oqytýdy mektepaldy daıarlyqtan joǵary oqý ornynan keıingi bilim berýdiń basqa satylaryna da engizýge bolady. Bul týraly búgin Astanada ótken baspasóz máslıhatynda Qazaqstan shahmat federasııasynyń (QShF) basshylary men Halyqaralyq shahmat federasııasynyń (FIDE) sarapshylary málimdedi, dep habarlaıdy Egemen.kz.
2016-2020 jyldary QShF «Mekteptegi shahmat» pılottyq jobasyn júzege asyrǵan edi. Joba Almaty, Qyzylorda, Pavlodar oblystaryndaǵy 18 mektepte júzege asty. Onyń aıasynda 2-4 synyptarda shahmat sabaǵy ótkizildi. Shahmat oınaǵan mektep oqýshylarynyń ıntellektýaldyq kórsetkishteri men shyǵarmashylyq qabiletteriniń kúsheıgendigi, alańdaýshylyq deńgeıiniń tómendeýi, aýyzsha sóıleý jáne logıkalyq oılaý kórsetkishteriniń, matematıka, jaratylystaný páni, gýmanıtarlyq baǵyttar boıynsha oqý úlgeriminiń jaqsarǵany baıqaldy. Pılottyq joba qazaq jáne orys tilderinde oqıtyn 1738 oqýshyny qamtydy.
Sonymen qatar, Qazaqstan Respýblıkasynyń joǵary oqý oryndarynda shahmat muǵalimderin daıarlaý úshin «Shahmatty oqytýdyń teorııasy men ádistemesi» oqý baǵdarlamasy ázirlendi. Bul jumysqa Batys Qazaqstan ınnovasııalyq-tehnologııalyq ýnıversıteti (Oral), S.Amanjolov atyndaǵy Shyǵys Qazaqstan memlekettik ýnıversıteti (О́skemen), Innovasııalyq Eýrazııa ýnıversıteti (InEÝ, Pavlodar), Qorqyt ata atyndaǵy Qyzylorda ýnıversıteti qatysty.
«Shahmatty mektep baǵdarlamasyna engizý ıdeıasy kópten beri talqylanyp keledi. Biz memlekettik standarttardyń paıda bolýyn kútpeı-aq, jekemenshik mektepterdiń bul tájirıbeni qalaı qabyldap jatqanyn kórip otyrmyz. Biz Memleket basshysyna shahmatty bilim berý baǵdarlamasyna engizý kerektigin aıtyp, odan tolyq saıası qoldaý aldyq. Shahmatty mektep baǵdarlamasyna fakýltatıvtik pán retinde engizý jospary ázirlenýde», dedi QShF birinshi vıse-prezıdenti Dármen Sádýaqasov.
FIDE - Chess in Education komıssııasynyń tóraǵasy Leonse Garsıa (Ispanııa) jáne komıssııa hatshysy Rıta Atkıns (Vengrııa) óz kezeginde shahmatty oqý úderisine engizýdiń halyqaralyq tájirıbesi men onyń nátıjesinde oqýshylardyń pánder boıynsha kórsetkishteri jaqsarǵanyn aıtty. Olar jalpy bilim beretin mektepterde shahmatty engizýge memleket tarapynan kórsetilip jatqan qoldaýdyń mańyzdylyǵyna toqtaldy.