Aýyl sharýashylyǵy mınıstri Erbol Qarashókeev Premer-mınıstrge ınflıasııany baqylaý jáne tómendetý boıynsha qandaı sharalardy júzege asyryp jatqany týraly baıandap berdi, dep habarlaıdy Egemen.kz AShM baspasóz qyzmetine silteme jasap.
Mınıstr jyl basynan beri maýsymaralyq kezeńde ótkizý úshin kúzgi jáne erte pisetin kókónisti forvardtyq satyp alý bóliginde turaqtandyrý qorlarynyń jumysy qaıta formattalǵanyn atap ótti.
Sonymen qatar, qant jáne maı zaýyttary sııaqty óńdeý zaýyttaryna shıkizat satyp alýǵa aınalym qarajaty beriletin bolady. Memlekettik qoldaý jáne arzandatylǵan astyqty ótkizý tetikteri arqyly qarjylandyrý máselesi jeke pysyqtalyp jatqanyn aıtty.
Azyq-túlik korporasııasynyń 800 myń tonna astyqty forvardtyq satyp alýy úshin jarǵylyq kapıtalyn ulǵaıtýǵa respýblıkalyq bıýdjetten 70 mlrd teńge bólý boıynsha jumys júrgizilip jatyr.
Kartop, qyryqqabat, sábiz jáne pııaz sııaqty erte pisetin kókónis egistik alqaptary ulǵaıtyldy. Turaqtandyrý qorlarynyń júktemesin qamtamasyz etý úshin olardyń jumys prınsıpi qaıta qaraldy. Endi ákimdikter óńirdiń qajettiligin óńirlik suranys negizinde halyqtyń 3 aılyq qajettiliginiń 50%-na deıin aıqyndaıdy. ÁKK aýyl sharýashylyǵy taýaryn óndirýshilerden ónimdi ótkizý bastalǵanǵa deıin kókónisterdi saqtaý shartymen forvardtyq satyp alýdy júzege asyrady.
«Áleýmettik mańyzy bar azyq-túlik taýarlaryn óndirýshiler úshin «aınalym shemasyn» qaıta formattaý kózdelip otyr. Qarjylandyrýdyń 70% fermerler men óńdeýshi kásiporyndarǵa bólinetin bolady. AShM-niń tıisti buıryǵy jarııa talqylaýdan ótýde jáne salalyq qaýymdastyqtarǵa joldandy», dedi mınıstr.
Erbol Qarashókeev aýyl halqynyń tabysyn arttyrý jónindegi «Aýyl amanaty» jobasy bastalǵanyn atap ótti. Bıyl joba aıasynda 100 mlrd teńge bólý kózdelgen, bul aýyl turǵyndaryna 2,5%-dyq 17 myńnan astam jeńildikti shaǵyn nesıe berýge, sondaı-aq 18 myńnan astam jumys ornyn qurýǵa múmkindik beredi.
Mınıstrdiń aıtýynsha, shaǵyn nesıelendirýden bólek, AО́K salasyndaǵy iri ınvestısııalyq jobalardy iske asyrý boıynsha SQO-nyń tabysty tájirıbesin elimizdiń basqa óńirlerinde engizý kózdelgen. 100 mlrd teńgege jyldyq 2,5%-ben sút-taýar fermalarynyń qurylysy qarjylandyrylady. Aldaǵy ýaqytta ınvestpýldy ulǵaıtý jáne oǵan qus etin óndiretin kásiporyndardy, qarqyndy sýarý jobalary, kókónis qoımalary men balyq zaýyttaryn qosý josparlanyp otyr.
«2026 jylǵa deıin 900-ge jýyq jańa ınvestısııalyq joba paıda bolady. Jańa ınvestısııalyq jobalardy iske asyrý negizgi azyq-túlik taýarlary boıynsha ımportty almastyrý máselesin sheshýge yqpal etedi. Tek 2023 jyly quny 536,2 mlrd teńge bolatyn 291 kásiporyn ashý josparlanǵan, onyń ishinde azyq-túlik óndirisi, mal sharýashylyǵy jáne ósimdik sharýashylyǵy kompanııalary bar», dep tolyqtyrdy AShM basshysy.