Premer-mınıstr negizgi maqsat jyl sońyna deıin ınflıasııany 2 ese tómendetý ekenin atap ótti. Osyǵan baılanysty memlekettik organnyń árbir jaýapty basshysyna keshendi jospardyń is-sharalaryn sapaly oryndaýǵa bar kúsh-jigerin salýdy talap etti, dep habarlaıdy Egemen.kz Úkimettiń baspasóz qyzmetine silteme jasap.
«Úkimet pen jergilikti atqarýshy organdardyń basty mindeti – áleýmettik mańyzy bar azyq-túlik taýarlarynyń baǵasyn turaqtandyrý. Degenmen, azyq-túlik ınflıasııasy keıbir ákimdikterdiń tıimsiz jumysyn kórsetip otyr», dedi Álıhan Smaıylov.
Ol ótken aptada (11-18 sáýir aralyǵynda) áleýmettik mańyzy bar azyq-túlik taýarlarynyń baǵasy 0,1%-ǵa óskenin atap ótti. Bul rette Aqtóbede, О́skemende, Semeıde, Qyzylordada – 0,2%-ten joǵary boldy.
«О́ńir ákimdikteri áleýmettik mańyzy bar ónimder baǵasyna monıtorıngti kúsheıtýi qajet. Ásirese, ústeme baǵalardyń tıisti 15%-dyq mólsherden asyp ketpeýin qadaǵalaý kerek. Ákimdikterde bul úshin barlyq múmkindikter bar», dedi Premer-mınıstr.
Ol ishki naryqtaǵy otandyq taýarlardyń úlesin ulǵaıtýǵa kúsh salý, taýarlardy saqtaý jáne tasymaldaý isine qoldaý kórsetý qajet ekenin aıtty.
«Halyq qabyldanyp jatqan sharalardyń naqty nátıjesin kórýi kerek», dep atap ótti Álıhan Smaıylov.
Sonymen qatar óńirlerde forvardtyq satyp alý, turaqtandyrý qorlary, aınalym shemasyn qoldaný, monopolııaǵa qarsy jáne saýdadaǵy retteý sharalarynyń iske asyrylýyn erekshe baqylaýda ustaý mańyzdy.
«Jergilikti jerlerde bızneske azyq-túlik taýarlarynyń óndirisin ulǵaıtýǵa, saqtaý kólemin keńeıtýge, logıstıkaǵa, óńdeý ónerkásibindegi jobalardy iske asyrýǵa barynsha qoldaý kórsetý qajet», dep atap ótti ol.
Sóz sońynda Premer-mınıstr keshendi is-sharalardyń oryndalý barysyn úılestirýdi qamtamasyz etý, sondaı-aq aı saıyn jaýapty memlekettik organdarmen birlesip onyń iske asyrylý barysyn qarastyrý jáne tıisti sheshimder qabyldaý qajet ekenin aıtty.