Prezıdent tapsyrmasymen Almaty oblysyna arnaıy barǵan Densaýlyq saqtaý mınıstri Ajar Ǵınııat issaparyn aldymen Eńbekshiqazaq aýdanynyń Esik qalasyndaǵy kópbeıindi aýrýhananyń tynys-tirshiligimen tanysýdan bastady. Bul ortalyqta Dúnıejúzilik densaýlyq saqtaý uıymynyń Eýropalyq óńirine múshe 53 memleket úshin medısınalyq-sanıtarlyq alǵashqy kómek (MSAK) boıynsha álemdegi alǵashqy demonstrasııalyq alań ashylǵan bolatyn. Sodan beri bul jańashyldyq tóńireginde tórtkúl dúnıeden delegasııalar kelip, ózara pikir almasýlar ótkizýdi dástúrge aınaldyrǵan.
Atalǵan aýrýhanada osy kúni Densaýlyq saqtaý mınıstrliginiń kóshpeli alqa jumysy uıymdastyryldy. Oǵan qatysýshylar óńirlerge translıasııalaý maqsatynda atalǵan aýrýhana bazasyndaǵy alǵashqy medısınalyq kómek kórsetýdiń ozyq tájirıbesin zerdeledi.
Budan keıin Densaýlyq saqtaý mınıstri Ajar Ǵınııat oblys ortalyǵy – Qonaev qalasyndaǵy Mádenıet úıinde oblys halqymen jáne azamattyq sektormen kezdesý ótkizdi. Kezdesýde densaýlyq saqtaýdy damytýdyń birneshe basym baǵyttaryn, atap aıtqanda, medısınalyq-sanıtarlyq alǵashqy qyzmet (MSAK) uıymdarynda medısınalyq qyzmetterdiń qoljetimdiligin qamtamasyz etý jáne qamtýdy keńeıtý, aýyldyq medısınany damytý, ana men bala densaýlyǵyn saqtaý, dári-dármekpen qamtamasyz etýdi jaqsartý boıynsha baıandady.
– Biz Memleket basshysynyń halyqqa medısınalyq kómek kórsetýdiń tıimdiligin arttyrý jónindegi tapsyrmalary sheńberinde keshendi jumys júrgizip jatyrmyz. Nátıjesinde, el boıynsha densaýlyq saqtaýdyń negizgi medısınalyq-demografııalyq kórsetkishteriniń oń dınamıkasy baıqalady. Almaty oblysyndaǵy kórsetkishterge keler bolsaq, halyqtyń jalpy ólimi 13 paıyzǵa tómendedi. Sondaı-aq qanaınalym júıesi aýrýlarynan bolatyn ólimniń kórsetkishi – 26 paıyzǵa, obyr – 5 paıyzǵa, tynys alý aǵzalarynyń aýrýlarynan bolatyn ólim – 43 paıyzǵa, al týberkýlezden bolatyn ólim 25 paıyzǵa tómendedi, – dedi mınıstr.
Aýyl turǵyndaryna medısınalyq kómektiń qoljetimdiligin qamtamasyz etý úshin ótken jyly 107 MSAK nysany paıdalanýǵa berildi. Almaty oblysynda 17 jyljymaly medısınalyq keshen 289 myń aýyl turǵynyn qamtydy.
Osy jyly aýyldyq densaýlyq saqtaýdy jańǵyrtý jónindegi ulttyq joba sheńberinde elimizde 655 MSAK nysanynyń qurylysy qarqyn alatyn bolsa, sonyń 38-i Almaty oblysyna tıesili.
Insýlt, ınfarkt, jaraqat jáne basqa jaǵdaılarda shuǵyl medısınalyq kómek kórsetýdiń jedeldigi men qaǵıdatyn ustana otyryp, joǵary tehnologııalyq medısınalyq jabdyqtarmen, onyń ishinde 32 aýdanaralyq emhananyń telemedısınasymen rekonstrýksııalaý jáne jaraqtandyrý qamtamasyz etiledi. Bul pasıentterdi qajetti medısınalyq tekserý men em alý úshin qalalarǵa barý qajettiliginen aryltady. Osy maqsatta Almaty oblysynda, atap aıtqanda, Qarasaı aýdanynda eki aýdanaralyq ortalyq aýrýhana qurý josparlanǵan.
Azamattardy qabyldaýda sala basshysyna dárihananyń bólshek-saýda jelisindegi baǵalardy retteý jáne dárilik naryqty baqylaý, MÁMS júıesi esebinen zeınetkerlerge stomatologııalyq kómek alý múmkindigi týraly birqatar ótinish jiberildi.
Osy jolǵy elmen júzdesýinde Densaýlyq mınıstri óńir turǵyndarynyń árbir ótinishine tolyq túsinikteme berip, vedomstvonyń beıindi departamentterine sheshimderdi pysyqtaýdy tapsyrdy.
Almaty oblysy