Qostanaı oblysynda memlekettik tildiń mártebesin kóterý, tildi erkin meńgerýge jaǵdaı jasaý, qoldanys aıasyn keńeıtý maqsatynda jasalyp jatqan is-sharalar az emes. Búginde memlekettik qyzmettegi qujat aınalymy qazaq tilinde júrgiziledi.
Prezıdent janyndaǵy Memlekettik basqarý akademııasy men onyń óńirlik fılıaldarynyń da osy baǵytta atqaryp jatqan qyzmeti aýqymdy. Akademııa memlekettik qyzmetshilerdiń tildik quzyrettiligin arttyryp, memlekettik organdarda memlekettik til saıasatyn úılestirý jumystarymen turaqty shuǵyldanady. Qazaqstan Respýblıkasyndaǵy til saıasatyn iske asyrýdyń 2020-2025 jyldarǵa arnalǵan memlekettik baǵdarlamasyn oryndaýǵa atsalysyp, úsh tildi biliktilikti arttyrý semınarlaryn júrgizedi. Akademııa biliktilikti arttyrý semınarlary men qaıta daıarlaý kýrstary sheńberinde jyl saıyn memlekettik qyzmetshiler aýyzsha, jazbasha tildik quzyrettiligin arttyrady.
Atap aıtqanda, «Resmı jazylym», «Memlekettik tilde is qaǵazdaryn júrgizý», «Iskerlik qarym-qatynas», «Sóıleý mádenıeti», «Sheshendik óner» jáne t.b. taqyryptarda semınarlar men kýrs barysynda taqyryptyq sabaqtar, semınar-trenıngter, dóńgelek ústelder, kezdesý keshter, túrli baǵyttaǵy is-sharalar memlekettik tilge degen qyzyǵýshylyqty arttyryp, erekshe den qoıyp, bilim alýlaryna yqpal jasaıdy. Sabaq barysynda dástúrli jáne ozyq ınnovasııalyq tehnologııalar qoldanylady. Jańa tehnologııalar arqyly oqytý qazaq tilin úıretýdiń sapasy men mańyzyn arttyrady. Tildi sıfrlyq tehnologııalar arqyly oqytý, aýdıo-beıne materıaldar, róldik oıyndar men iskerlik oıyndar, toptyq, juptyq jumystar arqyly oqytý ádis-tásilderi keńinen paıdalanylady.
Aıta ketetin jaıt, akademııa joǵary oqý ornynan keıingi tildi oqytý tujyrymdamasyn ázirlenip, sonyń negizinde tildi deńgeılep oqytý tehnologııalary men «Qazaq Resmi Test» (QRT) baǵalaý quralyn engizdi. «Qazaq resmi test» – kez kelgen tapsyrýshynyń memlekettik tildi meńgerý deńgeıin anyqtap, tildik deńgeıdi kóterý úshin qoldanylatyn testilik júıe. QRT 2019 jyldan bastap aprobasııadan ótýde. Sodan beri 13332 memlekettik qyzmetshi QRT tapsyryp, tildik deńgeıin anyqtady, ártúrli deńgeıdegi sarapshylardyń usynystary eskerilip, jetildirý jumystary turaqty túrde júrgizilip keledi. Máselen, akademııanyń Qostanaı oblysy boıynsha fılıalynda jyl saıyn eki myńǵa jýyq memlekettik qyzmetshi oqýdan ótedi. О́tkizilgen ár semınar men ár kýrs baǵdarlamasyna tildik quzyrettilikti damytatyn arnaıy sabaqtar josparlanyp, oblystyq «Tildaryn» tilderdi oqytý ortalyǵynan kásibı mamandar sabaq berýge shaqyrylady. Atqarylǵan jumys nátıjesinde memlekettik qyzmetshiler qazaq tilinde resmı jazý, qujattardyń mátinderin resmı tilde qurastyrý, memlekettik tilde sóz saptaý, kópshilik aldynda sóıleý daǵdylaryn shyńdaıdy.
Osylaısha, júıeli jumys nátıjesinde akademııa men onyń óńirlik fılıaldary qazaq tiliniń tolyqqandy memlekettik tilge aınalýyna atsalysyp keledi.
Aqerke BEKAHMETOVA,
Prezıdent janyndaǵy Memlekettik basqarý akademııasy Qostanaı oblystyq fılıalynyń dırektory