ASTANA. 11 shilde. О́tken túnde Almatynyń «Qaırat» komandasy Qaraǵandynyń «Shahteri» men Astananyń «Astanasysynyń» sátti jolyn jalǵastyryp, Eýropa lıgasy irikteý raýndynyń kelesi kezeńine ótti. Bul týraly egemen.kz habarlady.
Almatylyqtar eki oıynnyń qorytyndysy boıynsha Albanııanyń «Kýkesı» komandasyn utyp ketti. Atap aıtqanda, olar budan bir apta buryn óz alańynda 1:0 esebimen jeńiske jetken bolsa, túnde qonaqta 0:0 esebimen teń oınady.
Qarymta oıyn Albanııanyń astanasy – Tırana qalasynyń «Kemal Stafa» stadıonynda ótti. Alań ıeleri birinshi mınýttan Almatydaǵy oıynnyń eń sońǵy mınýtynda jiberip alǵan goldarynyń esesin qaıtarýǵa umtyldy. Bul ýaqyttarda «Qaırat» ta alańsyz qorǵanysta qoıǵan joq. Onyń sol tustaǵy eki qarsy shabýyly gol ákele jazdady. Aıtalyq, Baýyrjan Islamhannyń soqqysy qaqpa baǵanynan qaıtsa, «Aqtóbemen» oıynda het-trık jasaǵan komanda debıýtanty Jerar Goýdyń urǵan dobyn golkıper qaǵyp aldy. Tutastaı alǵanda, birinshi taımdaǵy oıyn alma-kezek shabýylmen órnekteldi. Sonyń barysynda qaqpashy Dmıtrıı Homıch birneshe ret almatylyqtar qaqpasyn aman saqtap qaldy.
Ekinshi taım taǵy da «Kýkesıdiń» shabýylymen bastaldy. О́z kezeginde «Qaırat» olardy muqııat qaıtarýmen boldy. Sosyn Islamhan taǵy da ótkir shabýyldyń ótinen kórindi. Onyń bul jolǵy soqqysy baǵannyń janynan ótti. Budan keıin kúsheıip ketken jaýyn eki jaqty abaılap oınaýǵa májbúr etti. Komandalar sonda da bolsa, tarazy basyn ózderine aýdarýǵa tyrysyp baqty. Alaıda, matchtyń sońyna deıin tablodaǵy 0:0 degen esep ózgermedi.
Munyń aldynda «Shahter» men «Astana» komandalary kelesi kezeńge ótken bolatyn. Armenııa jasaqtarymen kúsh synasqan olardyń ekeýi de eki oıynnyń qorytyndysy boıynsha 6:1 degent eseppen jeńiske jetti. Keshe elordalyq komanda «Pıýnıkti» 2:0 etip tize búktirse, kenshiler «Shırakty» 4:0 etip talqandap shyqty.
Sóıtip, Eýropa lıgasynda oınap jatqan Qazaqstannyń úsh komandasy da irikteý raýndynyń kelesi kezeńine ótti.
Damır Qojamqul.
Derekkóz: egemen.kz.
Foto: vesti.kz.