Mal sharýashylyǵyn kásipke aınaldyrǵan Kegen aýdanynda 54 334 iri qara, 30 549 bas jylqy bar. Atalǵan aýdandaǵy sharýa qojalyqtar sany – 1 501 bolsa, onyń altaýy asyltuqymdy sharýashylyq sanatynda. Atap aıtsaq, «Kaz mıaso» JShS-i 4 200 bas aberdın angýs, «Kólsaı qurylys» JShS-i «Áýlıekól» atalatyn asyltuqymdy iri qara ósirýde.
Sonymen qatar «Senim» sharýa qojalyǵy – 3 000 bas, «Darhan» sharýa qojalyǵy – 2 500 bas, «Qumtekeı» jáne «Tantybaı» sharýa qojalyqtary 2 100 bastan arqar-merınos qoıyn asyldandyrýmen aınalysyp otyr.
Búginde aýdan boıynsha 210 659 bas qoı-eshki bolsa, sonyń ishinde 104 707 bas saýlyq tóldep bitýge taıandy. Qazirgi nátıje boıynsha ár júz saýlyqtan 95-100 qozydan alý jospary tolyq oryndalaryna senim mol.
Bıylǵy kóktem malshylar úshin qolaısyzdaý bolyp, birshama qıyndyq týdyrdy. Aýa raıynyń qubylmalyǵyna qaramastan jańa týǵan tóldi aman-esen aıaqtandyryp, shyǵynǵa jol bermeýge bar qajyr-qaırattaryn salyp, taıly-taıaǵymen jumylyp jatyr. Sonyń biri – Sarytaýdyń baýraıynda 695 bas asyl tuqymdy arqar-merınos qoıyn tóldetken Jumash Sýataev ıelik etetin «Ularly» sharýa qojalyǵy.
– Sáýirdiń basynan bastalǵan tól alý naýqanyna tyńǵylyqty daıyndyqpen keldik. Bul syndarly sátten mal basyn aman alyp shyǵýǵa on shaqty tólshi tynym tappaı qolǵabys jasap jatyr. «Birlik bar jerde – tirlik bar» degen, bir kisideı jumyla eńbek etýdiń arqasynda jańa týǵan tóldiń enesine erip, óristi jas tólge toltyrýǵa kúsh salýdamyz. Maldyń jartysynan kóbi tóldep boldy, degen sharýa qojalyǵynyń basshysy Jumash Sýataev buǵan qosa et baǵytyndaǵy 100 bas analyq iri qaranyń da buzaý ertkenin tilge tıek etti.
«Mal baqqanǵa bitedi» demeýshi me edi atalarymyz. Sol aıtqandaı eseli eńbek, tókken terdiń arqasynda atalǵan aýdanda mal tóldetý naýqany jaqsy nátıjelermen aıaqtalar kún jaqyn.
Almaty oblysy