Májilis depýtaty Naýryz Saılaýbaı Qazaqstanda sheteldik kólikterdi zańdastyrý merzimin uzartýdy usyndy, dep habarlaıdy Egemen.kz.
Naýryz Saılaýbaı 2022 jyldyń 1 qyrkúıeginde Qasym-Jomart Toqaev Qazaqstan halqyna Joldaýynda elge zańsyz ákelingen avtokólikterdi zańdastyrý boıynsha bir rettik shara qoldanýdy usynǵanyn eske saldy.
Nátıjesinde elge ákelingen sheteldik kólikterdi 2023 jylǵy 1 shildege deıin zańdastyrý týraly sheshim qabyldandy. Biraq depýtat Qazaqstan azamattary birqatar sebepterge baılanysty shetelde kólik satyp alýyn jalǵastyryp jatqanyn jáne bolashaqta bul jaǵdaı kúrdeli áleýmettik máselelerge ákelýi múmkin ekenin aıtty.
«Sheteldik kólikterdi zańdastyrý merzimin elge zańsyz ákelýge qarsy naqty sharalardy anyqtap, bekitkenge deıin uzartýdy usynyp otyrmyz», dedi Naýryz Saılaýbaı.
Bul rette, depýtat máseleniń áleýmettik jaǵyna da toqtaldy.
«Bul kólik ıeleriniń arasynda jalǵyzbasty analar, kóp balaly otbasylar, múmkindigi shekteýli balalardy tárbıelep otyrǵan otbasylar, 35 jasqa deıingi jastar bar», dep qosty Naýryz Saılaýbaı.