Jasandy ıntellekt (AI) kómegimen aýqymdy derekterdi taldaıtyn «Presight AI» kompanııasy men «Astana Hub» halyqaralyq tehnoparki «AI Battle» jarysyn ótkizdi. Jarys jasandy ıntellekt, úlken derekter jáne mashınalyq oqytý salasyndaǵy startap-ıdeıalar deńgeıin kóterýge ári bıznes aıasyn keńeıtýge baǵyttalǵan.
Jarysqa 50-den asa ótinim túsken. Sonyń ishinde 11 startap fınaldyq dodaǵa ótti. Olar óz jobalaryn 3 mınýttyń ishinde qazylar alqasyna tanystyryp, kásibı keńester, usynystar men áleýetti seriktester tabý múmkindigine ıe boldy.
– Biz «Astana Hub»-pen seriktestik aıasynda «AI Battle» baıqaýyn uıymdastyryp, jasandy ıntellektiniń sheksiz áleýetin paıdalanýǵa umtylatyn jańa startaptarǵa qoldaý kórsetýge nıettimiz. Maqsatymyz – jasandy ıntellekt arqyly aýqymdy derekterdi taldaýdaǵy tájirıbemizge súıene otyryp, olarǵa damyp, jańa baılanystar tabý úshin qajetti resýrstar men platformany usyný. Jeńimpazdar ındýstrııanyń damýyna úlken úles qosady degen oıdamyz, – deıdi «Presight AI» bas dırektory Tomas Pramotedham.
«Alaqan», «Relive» jáne «ARA» startaptary úsh negizgi atalymda jeńimpaz atanyp, sáıkesinshe 10 myń dollar, 5 myń dollar jáne 3 myń dollar júlde qoryna ıe boldy.
– Jasandy ıntellekt jáne úlken derekter salasynda belsendi jumys istep jatqan otandyq startaptardyń kóbeıgeni qýantady. Búgingi dáýirde derekterge negizdelgen analıtıka mańyzdy ról atqarady jáne olardy óz bıznesine engizetin startaptarymyzdy damytý qajet. «Astana Hub» men «Presight AI» seriktestigi jáne aldaǵy birlesken baǵdarlamalarymyz arqyly kásiporyndar men startaptarǵa ózderiniń ınnovasııalaryn engizý úshin qajetti qoldaý kórsetýdi maqsat etip otyrmyz, – deıdi Sıfrlyq damý, ınnovasııalar jáne aeroǵarysh ónerkásibi vıse-mınıstri Asqar Jambaqın.
Esterińizde bolsa, bıyl qańtarda «Astana Hub» Birikken Arab Ámirlikteriniń «Presight AI» kompanııasymen yntymaqtastyq týraly memorandýmǵa qol qoıǵan bolatyn. Osy kelisim aıasynda «Group42» operasııalyq kompanııasy «Presight AI» «Astana Hub» qatysýshylarynyń startap jobalaryn venchýrlyq qarjylandyrý múmkindigin qarastyryp jatyr. Sondaı-aq «Presight AI» Qazaqstan, Ortalyq Azııa, Ázerbaıjan jáne Mońǵolııadan kelgen tehnopark qatysýshylarynyń startap jobalaryna Taıaý Shyǵys pen Afrıka naryǵyna shyǵýǵa kómektesedi.
Jasandy ıntellekt – asa mańyzdy jáne eń jyldam damyp kele jatqan tehnologııalyq úrdis. Sarapshylardyń deregi boıynsha AI jahandyq naryǵynyń kólemi baǵdarlamalyq-tehnıkalyq quraldar men qyzmetterdi qosqanda, 2021 jyly 383,3 mlrd dollardy qurady. Bul 2020 jylmen salystyrǵanda 20,7 paıyzǵa joǵary. О́tken jyly naryq shamamen 450 mlrd dollarǵa ósti jáne aldaǵy ýaqytta da osyndaı dınamıka jalǵaspaq.