Uly Jeńistiń 65 jyldyǵyna baılanysty elimizdiń tústik shalǵaıynda jatqan OQO-nyń Shardara aýdanynda da aıtýly sharalar ótkizilýde.
Jalpy, tústik aǵaıyndar “óli razy bolmaı, tiri baıymaıdy” degen qazaqtyń qaǵıdasyn qatty ustaıdy. Bıyl oblys ortalyǵy Shymkent qalasynda “Dańq” memorıaly ashylyp, oǵan osy óńirden soǵysqa qatysqan 140 myń adamnyń esimderi jazylyp, máńgi eske alynyp turýy da sonyń aıǵaǵy. Shardara ákimdigi de bul óreli úrdiske ózindik úles qosyp keledi. Aýdan ákimi Marǵulan Maraımnyń bastamasymen Jeńistiń 65 jyldyǵy jáne alda bolatyn Konstıtýsııanyń 15 jyldyǵy qurmetine 33 tyl jáne eńbek ardagerin, az qamtylǵan otbasylardan shyqqan 14 ozat oqýshylardy Astanaǵa týrıstik saparmen alyp kelgeni sol isterdiń bir parasy ǵana.
Biz shardaralyq aqsaqaldar men jastardy elordanyń sol jaǵalaýynyń kóshelerindegi ásem ǵımarattarǵa áserlene qarap, eline, jerine degen maqtanyshty sezimmen júrgenderinde jolyqtyrdyq. Olardyń bári de osyndaı ǵajap qalany salyp, Qazaqstannyń ekonomıkalyq áleýeti men qazaqtyń iskerligin álemge tanytyp jatqan Elbasy Nursultan Nazarbaevqa sheksiz rızashylyqtaryn bildirdi. “Basqardyńyz halqyń mingen kemeni, Kedergisiz keme júzip keledi. Búkil álem moıyndaǵan lıderge – barlyq ǵalam esh shúbásiz senedi. Ataq-dańqpen kókke jetse tóbemiz, Shashý shashyp, toılamaıyq nege biz?” dep aralaryndaǵy jergilikti aqyn Qurbanbek Shámetuly aqsaqal óleńdetip qoıa berdi.
Biz topty bastap júrgen aýdandyq jumyspen qamtý jáne áleýmettik baǵdarlamalar bóliminiń bastyǵy Qystaý Ilesovti áńgimege tartyp, sapar barysy jaıly suraǵan edik. Ol osymen ekinshi ret aýdan ákiminiń tikeleı qoldaýynyń arqasynda Astanaǵa aqsaqaldar men jastardy ákelip otyrmyz, dedi. Alǵashqy sapar 2008 jyly uıymdastyryldy, onyń aýdan halqynyń arasyndaǵy ulaǵatty áseri zor boldy. Astanany kórip kelgen aqsaqaldarmen kezdesýler ótkizilip, olar ózderiniń áserlerin birneshe kún boıy, birneshe jerde baıandap berdi, al oqýshy jastar Astana týraly shyǵarmalar jazyp, óz aralarynda konkýrstar ótkizdi. Sol kezde-aq osy sharany turaqty dástúrge aınaldyrýdy oılaǵanbyz. Biraq “joqtyq jomarttyń qolyn baılaıdy” degendeı, búkilálemdik ekonomıkalyq daǵdarystyń salqyny bizge de tıip, byltyr bul sapardy jalǵastyra almaı qaldyq. Al bıyl ony qaıtadan qolǵa alyp otyrmyz. Biz Astananyń kórikti jerlerin, sonyń ishinde Tuńǵysh Prezıdent murajaıynda, “Dýman” oıyn-saýyq ortalyǵynda, “Nur-Astana” meshitinde bolyp, “Báıterekke” shyǵyp, “Nurjoldyń” boıyndaǵy tamasha kórinisterdi tamashaladyq. “Otan-ana” monýmentinde de bolyp, Uly Otan soǵysynda sheıit bolǵandardy bir sát eske alyp, rýhtaryna bas ıdik. Sol jerde aqyn aǵamyz Qurbanbek Shámetuly óziniń óleńderin oqydy. Odan keıin jerles-depýtatymyz Tólebek Qosmambetovtiń kómegimen Parlament úıine kirip, onyń ishki tynysyn kórdik. Endi “Qazaq eli” monýmentin kórýge bara jatyrmyz. Saparǵa kelgenderdiń alǵan áseri orasan, ózderiniń osyndaı astanalary baryna jastarmen qatar úlkenderimiz de máz bola qýanýda, dedi ol.
Biz Qystaý aǵamyzdan eldiń jaıyn da surap, jańalyqtaryn bildik. Sonyń ishinde ol “Jol kartasy” baǵdarlamasynyń aýdanda jaqsy júrgizilip jatqanyn aıtty. “Ol elimizdegi jumyssyzdyqty tómendetýge baǵyttalǵan utymdy saıasat bolyp otyr. Byltyr aýdandaǵy 49 nysanǵa 2101 adam jumysqa ornalasty. Jastar praktıkasyna 180 adam tartylyp, árqaısysyna 15 myń teńgeden eńbekaqy tólendi. Al áleýmettik jumys ornyna ornalastyrylǵandardyń jalpy sany 230 adam boldy. Bıyl “Jol kartasy” jalǵasyn taýyp, 26 nysanda 750 jumys orny ashyldy, dedi ol.
Sondaı-aq, bir qýanyshty jáıtti de aýyz toltyryp aıtýǵa bolady eken. Eger buryn aýdanda tabıǵı gaz bolmaıtyn bolsa, bıyl “Túrkimenstan-О́zbekstan-Qazaqstan-Qytaı” gaz qubyrynan butaq tartylyp, Shardara aýdany tolyǵymen gazben qamtamasyz etiletin bolypty. Kúrdeli bolyp júretin aýyz sý máselesi de oń sheshimin tabýǵa jaqyn eken. Qazir táýliktiń 24 saǵaty boıyna sý berilý jumysy qolǵa alynyp jatyr. Oǵan tıisti qarajat bólingen kórinedi.
Eldiń rýhanı ómirinde de eleýli jańalyqtar bolyp jatyr eken. Ataqty jerlesimiz Tólegen Tájibaevtyń 100 jyldyǵyn laıyqty atap ótip, týǵan jerinde eskertkish ashyldy. Basqa da jergilikti batyrlar men aqyndar ulyqtalýda. Bekzat Sattarhanovtyń 30-ǵa tolýyna baılanysty respýblıkada tuńǵysh ret onyń eskertkishi de bizde ornatylyp, janyna saıabaq ashtyq, dedi Qystaý Ilesov. Osyndaı óreli isterdi estigende bizdiń de eńsemiz kóterilip qaldy.
Jaqsybaı SAMRAT.