Dúnıede kórmeý, estimeýden asqan qorlyq joq shyǵar. О́kinishke qaraı, sańyraý jandardyń qatary óspese kemimeı otyr. Búginde Almaty oblysynda estý qabiletinen aıyrylǵan myńnan asa naýqas esepte turady.
Jýyrda Almaty kópsalaly klınıkalyq aýrýhanasynda estý qabiletin qalpyna keltiretin kohlearlyq ımplantasııa boıynsha joǵary tehnologııalyq operasııa jasaldy. Mamandar mundaı hırýrgııalyq operasııalar eki qulaǵy da sańyraý nemese 4-dárejeli estý qabiletin joǵaltqan adamdarǵa jasalatynyn aıtady. Osy kúni operasııa jasalǵan 56 jastaǵy naýqastyń júıke júıesiniń kúızelýine baılanysty birinshi bir qulaǵy, keıinnen eki qulaǵy da múldem estimeı qalǵan. Endigi kezekte 4 apta ýaqyt ótken soń qulaqqa qoıylǵan kohlearlyq ımplantty qosý úderisi bastalady. Bul operasııany jasaý úshin alǵashqy talaptardyń biri – naýqas buryn estip, dybys pen áripterdiń qalaı aıtylatynyn bilý kerek eken. Al múldem estimeıtin, ıaǵnı týabitti sańyraý adamdarǵa mundaı operasııa jasalmaıdy.
«Kohlearlyq ımplantasııa» ádisi boıynsha estý júıkesiniń talshyqtaryn tikeleı elektrlik yntalandyrý arqyly ishki qulaqqa elektrodtyq júıelerdi engizedi. Bul ádis elimizdiń birneshe klınıkasynda ǵana júzege asyp keledi. Búginde Almaty kópsalalyq klınıkalyq aýrýhanasynyń dárigerleri medısına ǵylymdarynyń doktory, professor, «Otorınolarıngologııa Ulttyq medısına zertteý ortalyǵy» FMBÝ dırektorynyń halyqaralyq qyzmet jónindegi orynbasary Dıab Hassannyń qatysýymen operasııa jasalyp, tájirıbe almasty.
– Sheberlik sabaǵy aıasynda 8 operasııa jasaldy. Olardyń arasynda kohlearlyq ımplantasııa, endolımfa qapshyǵyn drenajdaý, tımpanoplastıka jáne ossıkýlopastıkamen sanıtarlyq operasııalar boldy. Bular eresek adamdar bolǵandyqtan, kópshiliginde qosalqy aýrýlar bar, sondyqtan dárigerler aldymen tolyq dıagnostıkadan ótken naýqastarǵa josparly túrde operasııa jasaýdy jón kórdi. Endigi kezekte oblys turǵyndary úshin kópsalaly aýrýhana qabyrǵasynda estý qabiletin qalpyna keltirýge tolyq múmkindik bar, – deıdi professor Dıab Hassan.
Almaty kópsalaly klınıkalyq aýrýhanasynyń otolarıngologııa bólimshesiniń meńgerýshisi Ásel Asqarqyzynyń aıtýynsha, Almaty oblysy boıynsha dıspanserlik esepte qulaq aýrýlary bar, onyń ishinde estý qabiletinen aıyrylǵan 1 myńnan asa naýqas tirkeýde tur.
– Otorınolarıngologııalyq kómek kórsetýdi arttyrý qajettigin eskere otyryp, biz oblysta alǵash ret kohlearlyq ımplantasııa boıynsha operasııa jasadyq. Buryn bizdiń naýqastarda munaı múmkindik bolmaǵan edi, aımaq turǵyndary úlken qalalardaǵy klınıkalarǵa barýǵa májbúr bolǵan. Oblystyq densaýlyq saqtaý basqarmasy jáne ÁMSQ arqyly biz naýqastarǵa kúrdeli sanattarynyń birine jatatyn ota jasaýǵa múmkindik aldyq, – dedi Á.Asqarqyzy.
Ol kohlearlyq ımplantasııa naýqastyń estý qabiletin 100 paıyz qalpyna keltirýge múmkindik beretinin, biraq bul dybys álemine qaıtýdyń tek alǵashqy qadamy ekenin, sodan keıin ǵana estý-sóıleýdi qalpyna keltirý kerektigin tilge tıek etti.
Keleshekte bul tásilge tóselgen dárigerler oblys turǵyndaryna ǵana emes, basqa aımaqtardan keletin naýqastarǵa da kómek qolyn sozbaq nıette.
Almaty oblysy