Qarjy mınıstri Erulan Jamaýbaev ótken jyly tıimsiz paıdalanylǵan bıýdjet qarajatynyń somasyn atady. Vedomstvo basshysynyń aıtýynsha, 2023 jyldyń 1 qańtarynda Qazaqstannyń memlekettik qaryzy 25,3 trln teńgeni quraǵan, dep habarlaıdy Egemen.kz.
Májilis otyrysy barysynda vedomstvo basshysy 2022 jylǵy respýblıkalyq bıýdjettiń atqarylýy týraly aqparat usyndy.
«Joǵary aýdıtorlyq palatanyń jáne tekserý komıssııalarynyń aýdıtorlyq is-sharalaryn esepke almaǵanda 2022 jyly bıýdjet qarajatyn tıimsiz paıdalaný somasy 217 mlrd teńgeni nemese shyǵystardyń jalpy kóleminiń 1,2%-yn qurady. Bıýdjet qarajatyn tıimdi jáne tolyq ıgerý úshin ákimshilerdiń jaýapkershiligin arttyrý úshin sharalar qabyldandy. 2022 jyldyń qorytyndysy boıynsha ortalyq jáne ákimdikterdiń 113 qyzmetkeri tártiptik jaýapkershilikke tartyldy, onyń ishinde 82 adam basshylyq qyzmetterdi atqarady», dedi ol.
Jalpy, onyń aıtýynsha, bıýdjet túsimderi 102,1%-ǵa oryndalyp, 16 trln 142 mlrd teńgeni qurady. Bul rette shyǵystar 18 trln 532 mlrd teńgege nemese 98,6%-ǵa oryndaldy. Al bıýdjet tapshylyǵy 2 trln 391 mlrd teńgeni nemese IJО́-ge 2,4%-dy qurady.
«Bıylǵy jyldyń 1 qańtaryndaǵy jaǵdaı boıynsha Qazaqstannyń memlekettik qaryzy 25,3 trln teńgeni nemese IJО́-ge 24,9%-dy qurady. Onyń ishinde úkimettik borysh IJО́-ge 21,7% nemese 22 trln teńgeni qurady», dep qosty Erulan Jamaýbaev.