Jetisý oblysynda habar-osharsyz ketken qart áıel eski áskerı polıgon mańynan tabyldy, dep habarlaıdy Egemen.kz.
«Panfılov aýdanynda joǵalyp ketken 72 jastaǵy Orynbúbi Muhanova tabyldy. 13 mamyrda úıinen shyǵyp ketken zeınetkerdi izdeý sharalary úsh kúnnen astam ýaqytqa sozyldy. Álsiregen áıel óziniń týǵan Lesnovka aýylynan 15-20 shaqyrym jerde eski áskerı polıgonnyń mańynan tabyldy», delingen Polisia.kz habarlamasynda. Polıseıler qart áıeldi izdeý jumystaryna týystarynan bólek eriktilerdi, shekarashylardy jáne jergilikti halyqty, barlyǵy 100-ge jýyq adam tartqan. Izdestirý tobynyń biri qalyń toǵaı arasynan ájeıdiń oramalyn taýyp, izdeý baǵytyn anyqtaǵan. Jalǵyz ózi júrgen áıeldi jergilikti shopandar baıqap, onyń izine túsip kele jatqan izdeýshilerge habarlaǵan. Zeınetker qatty álsirep qalǵan. Medısınalyq kómek kórsetkennen keıin týystary ony úıine alyp ketti.