Qazaqstan Respýblıkasynyń Ulttyq akademııalyq kitaphanasynda mádenıet jáne óner qyzmetkerleri kúnine oraı «Mádenıet: Kitap. Bilim. Til» festıvali ótedi, dep habarlaıdy Egemen.kz.
21 mamyrda mádenıet jáne óner qyzmerleri kúni atap ótiledi. Atalmysh mereke Prezıdent jarlyǵymen 2013 jyly bekitilgen edi.
Ataýly kún - rýhanı-mádenı ómirimizdiń ózegine jan bitirip otyrǵan azamattardyń mereıli merekesi. Osyǵan oraı Ulttyq akademııalyq kitaphanada «Mádenıet: Kitap. Bilim. Til» openair festıvali ótedi.
Festıval mádenıet, óner jáne kitaphana salasynda qyzmet etip júrgen, sondaı-aq bul salanyń damýyna úles qosqan mamandardy qoldaý maqsatynda uıymdastyrylyp otyr.
QR Mádenıet jáne sport mınıstri Ashat Oralov óńirlerden kelgen úzdik kitaphana qyzmetkerleri men elimizdiń túkpir-túkpirinen keletin ardager kitaphanashylardy mádenıet salasynyń joǵary nagradalarymen marapattaıdy.
Shara aıasynda jazýshylar, jýrnalıster, redaktorlar men kınorejısserlerdiń qatysýymen «Kitap oqý – jetistik tramplıni» atty NetWorking uıymdastyrylady. Baǵdarlamada «BOOKS-TOP» kitaphana men baspalardyń kórme-jármeńkesi, antıkvarlyq zattar, qoltańbalar jáne jańa kitaptar kórmesi, art-sheberlik saǵattary uıymdastyrylsa, balalar pavılonynda túrli kezdesýler, qoıylymdar ótedi. Ashyq dıalogta jazýshy-baspagerler ulttyq qundylyqtardy arttyrýdyń zamanaýı tásilderin talqyǵa salady. Tájirıbeli trenerler kitaphanalyq medıa jobalar, medıasaýattylyq, mobılografııa jáne SMM-tehnologııalary, TikTok kontentterin ázirleý syndy ózekti taqyryptardy qozǵaıdy. Sala damýyna qatysty mańyzdy máseleler «QUIZ» ıntellektýaldyq alańynda jalǵasady. Al basqa óńirlerden kelgen kitaphanashylar tájirıbelik keısterimen bólisedi.