Ǵylym jáne joǵary bilim mınıstri Saıasat Nurbek Májilistegi úkimet saǵatynda ǵylymı kadrlardyń áleýetine toqtaldy, dep habarlaıdy Egemen.kz.
Saıasat Nurbektiń aıtýynsha, qazir ǵylymı kadrlardyń sany 22 456 adamdy quraıdy. Ǵylymı zertteýshilerdiń 37%-y ǵylymı jáne akademııalyq dárejege ıe.
«Bul kórsetkish joǵary emes. Ǵylymdaǵy jastarǵa kelsek, jaǵdaı jaman emes. 35 jasqa deıin jas ǵalymdardyń úlesi – 34%-dy, negizgi top – 43%-dy (35-54 jas aralyǵyndaǵy ǵalymdar), 55 jastan joǵary ǵalymdar – 23%-dy quraıdy. Osy tusta ǵylymı zertteý ınstıtýttarynyń basshylyǵy jaıly sóz qozǵaǵym kelip otyr. Ǵylymı ınstıtýt basshylary qartaıyp barady. Ǵylymı zertteý ınstıtýttary basshylarynyń ortasha jasy – 59 jas. Qazir akademıkterdiń ortasha jasy – 69 jas», dedi Ǵylym jáne joǵary bilim mınıstri.
Vedomstvo basshysynyń aıtýynsha, Qazaqstanda 414 ǵylymı uıym bar. Olar – granttyq jobalar men ǵylymı zertteý jumystaryn atqaryp jatqan ǵylymı uıymdar. Memlekettik sektordyń, ıaǵnı mınıstrlikke baǵynatyn uıymdardyń sany 26%-dy quraıdy. 2015 jyly «Kommersıalandyrý týraly» zańdy qabyldaǵannan keıin ósim 43% boldy, ıaǵnı olar kásipkerlik-jekemenshik sektor uıymdary.
«Qazir bıznes aqyryndap ǵylymı zertteýge bet bura bastady. Ǵylymı zertteý ınstıtýttaryna toqtalaıyn. Qazir jalpy memlekettik organdardyń, vedomstvoaralyq baǵynyshty uıymdardyń sany – 104. Onyń ishinde naqty 92 ǵylymı jáne irgeli ǵylym ınstıtýty bar», dedi Saıasat Nurbek.
Mınıstrdiń málimetine súıensek eń joǵary paıyz aýyl sharýashylyǵy mınıstrligine tıesili – 33%, ıaǵnı 30 ǵylymı zertteý ınstıtýty.
«Eń kóp qarjylandyrýdy Aýyl sharýashylyǵy mınıstrliginiń ǵylymı zertteý ınstıtýttary alyp otyr. Bıyl olarǵa 19 mıllıardqa jýyq teńge, al Densaýlyq saqtaý mınıstrliginiń ınstıtýttaryna 35 mılılardqa jýyq teńge qarastyrylǵan», dep túıindedi Ǵylym jáne joǵary bilim mınıstri.