Onomastıka máselesine júrdim-bardym qaraýǵa bolmaıdy. О́ıtkeni eldi mekenderdegi eskirgen ataýlardan qutylýdy jeleý etip qana qoımaı, reti kelse, «kókesine kóshe berip, aýylynyń atyn atasyna aýystyrýdyń» yńǵaıyn izdegender de az emes. Alaıda jergilikti atqarýshy bılik dál osy máselege jete mán berip otyr.
Oblystyq Mádenıet, tilderdi damytý jáne arhıv isi basqarmasynyń málimetinshe, byltyrdan beri Aıagóz, Borodýlıha jáne Úrjar aýdandarynyń ıdeologııalyq turǵydan eskirgen kóshelerin qaıta ataý boıynsha sheshim qabyldanyp, Abaı oblysynyń óńirinen shyqqan belgili tulǵalardyń esimderi naqtylanǵan. Sol negiz boıynsha, respýblıkalyq onomastıka komıssııasymen maquldanatyn tarıhı tulǵalar tizimine engizý úshin tıisti organǵa joldanǵan jaıy bar. Atap aıtqanda, bıyl Abaı oblystyq onomastıka komıssııasynyń bir otyrysy ótkizilip, Aıagóz, Besqaraǵaı, Borodýlıha, Úrjar aýdandarynyń 44 kóshesin qaıta atap, 1 mádenıet, 28 bilim berý mekemesine belgili tulǵalardyń esimderin berý týraly usynystar qaralǵan. Komıssııa qorytyndysy boıynsha atalǵan aýdandardyń ıdeologııalyq turǵydan eskirgen 19 kóshesin qaıta ataý jaıy naqty sheshimin tapqany qýantady.
Bir qyzyǵy, oblystyń Besqaraǵaı, Borodýlıha aýdandarynda osy ýaqytqa deıin otyz jyl boıy Lenın, Kırov esimimen atalatyn kósheler saqtalyp kelgen edi. Qazir atalǵan aýdandardyń Lenın kóshelerine Abaı Qunanbaıuly, Shákárim Qudaıberdiuly, Dinmuhamed Qonaevtyń esimderi berilse, Kırov kósheleri Baıtaq, Amanat, Jibek Joly kósheleri dep qaıta atalýyna oblystyq komıssııanyń naqty sheshimi shyqty.
Mádenıet, tilderdi damytý jáne arhıv isi basqarmasynyń basshysy Aıdar Ibraevtyń málimetine súıensek, oblys aýmaǵyndaǵy 27 bilim jáne mádenı nysanǵa jańa ataýlar berý respýblıkalyq komıssııa qaraýyna usynylyp otyr. Atap aıtqanda, Semeı qalasynyń №1 balalar mýzyka mektebine – Latıf Hamıdı, №18 jalpy orta mektepke – Álimhan Ermekov, Abaı aýdanyndaǵy bir mektepke – Qunanbaı О́skenbaıuly, Aıagóz aýdanynyń №1 mektebine – Abaı Qunanbaıuly, Jarma aýdanynyń ortalyqtandyrylǵan kitaphana júıesine – Dýlat Babataıuly, Kókpekti aýdanynyń oqýshylar shyǵarmashylyq saraıyna Ámire Qashaýbaevtyń esimin berý tárizdi usynystar engizilgen.
Oblys ortalyǵy Semeıdegi kóshe ataýlarynyń taqtaıshalaryn jańartý jumystary da jandana túsken. Búgingi tańda Semeı qalasynyń turǵyn úı-kommýnaldyq sharýashylyq bóliminiń málimetterinde kórsetilgenindeı, Shákárim, Muhtar Áýezov dańǵyldarynda, Máńgilik el, Qabanbaı batyr, Baýyrjan Momyshuly, Jambyl, Fedor Dostoevskıı kóshelerinde 2858 anshlag ázirlenip, iline bastaǵan. Kelesi kezekte Abaı, Shoqan Ýálıhanov, Qaıym Muhamedhanov, Áset Naımanbaıuly, Mirjaqyp Dýlatuly, Maǵjan Jumabaev, Qanysh Sátbaev, Alash Qozbaǵarov, Aıtkesh Ibraev, general Bespaev, Tóleýbaı Amanov, Jaqııa Shaıjúnisov, akademık Pavlov, Júsipbek Aımaýytov, Beken Jamaqaev, Shyraqbek Qabylbaev, Keshirim Boztaev, Jánibek Karmenov, Májıt Begalın kóshelerin de qamtý josparlanyp otyr.
Abaı oblysy