Memleket basshysy Qytaı saparynda qol qoıylǵan vızasyz rejim eki eldiń týrızm salasyna oń áser etetinin aıtty, dep habarlaıdy Egemen.kz Aqordanyń baspasóz qyzmetine silteme jasap.
«Mádenıet jáne bilim salasyndaǵy yntymaqtastyqty, sondaı-aq týrızmdi damytý qajet. Jeke adamdardyń qarym-qatynasy memleketaralyq baılanystardy nyǵaıtýǵa septigin tıgizeri sózsiz. Qazaqstan men Qytaı azamattarynyń eki el arasynda 30 kúnge deıin vızasyz júrýine múmkindik beretin úkimetaralyq kelisimge qol qoıyldy. Bul qujat iskerlik baılanys aıasyn keńeıtip, týrıster legin arttyrýǵa yqpal etedi dep senemin», dedi Qasym-Jomart Toqaev.
Sondaı-aq Prezıdent týrıstik operatorlardyń tizimin jasaýdy usyndy.
«Ortalyq Azııa elderiniń mádenıeti – baı, kórikti jerleri de – kóp. Sonyń bári qytaılyq týrıster úshin qyzyqty bolary anyq. Osy oraıda men «Jibek joly» týrıstik operatorlarynyń tizimin jasaýdy usynamyn. Toptyq týrlar úshin vızasyz rejım engizip, biryńǵaı týrıstik klaster qurý qajet. Sol kezde qytaı týrısteri bir saparda Ortalyq Azııanyń birneshe eline bara alady», dedi Qasym-Jomart Toqaev.