Jedel jáne arnaıy is-sharalar barysynda Almaty polıseıleriniń nazaryna ilikken Almaty oblysy, Qarasaı aýdanynan gashısh jetkizip, qala aýmaǵynda satýmen aınalysqan 34 jastaǵy A. esimdi azamat ustaldy, dep habarlaıdy Egemen.kz.
«Arnaıy is-shara Almatynyń Alataý aýdanynda keshki alty jarymda júrgizildi. Kúdiktiniń Hyundai avtokóligi toqtatyldy. Jeke tintý kezinde, sondaı-aq kúdiktiniń turǵylyqty jeri boıynsha tintý kezinde birneshe polımer baılamdary tabylyp, tárkilendi. Olardyń ishinde jasyl tústi ósimdik tektes shańdy zat boldy. Sot-hımııalyq saraptamasynyń qorytyndysyna sáıkes, tárkilengen esirtki zaty asa iri kólemdegi gashısh ekeni anyqtaldy. Kúdikti ýaqytsha ustaý ızolıatoryna qamaldy», dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
QR QPK-niń 201-babyna sáıkes ózge aqparattar tergeý múddesine oraı jarııalaýǵa jatpaıdy.