Parlament Senatynyń depýtattary Nurtóre Júsip, Ǵalıasqar Sarybaev, Alısher Satvaldıev jáne Amangeldi Tolamısov Saıası qýǵyn-súrgin jáne totalıtarızm qurbandarynyń «ALJIR» memorıaldy-murajaı kesheninde boldy. Senatorlar saıası qýǵyn-súrgin men totalıtarızm qurbandaryna arnalǵan eskertkish qabyrǵaǵa gúl shoǵyn qoıyp, olardy bir mınýt únsizdikpen eske aldy, dep habarlaıdy Egemen.kz Senattyń baspasóz qyzmetine silteme jasap.
Senator Nurtóre Júsip keshenge kelýshilermen áńgime barysynda 31 mamyr – Qazaqstan tarıhynyń eń qaıǵyly betteriniń biri, mıllıondaǵan adamdardyń ómirin qıǵan jappaı saıası qýǵyn-súrgin men jan túrshigerlik asharshylyqty eske alý kúni ekenin atap ótti. Myńdaǵan qurbandardy eske alý úshin elimizde kóptegen sharalar ótýde, murajaılarda kórmeler ashyldy, memorıaldarǵa gúl qoıyldy, jańa derekter jarııalandy.
«Elimizde ótken ǵasyrdyń 30-shy jyldarynda bolǵan saıası qýǵyn-súrgin men asharshylyqtan zardap shekken mıllıondaǵan qazaqstandyqtardyń este saqtaý máselesine erekshe mán berilip otyr. Memleket basshysy Qasym-Jomart Toqaevtyń bastamasymen elimiz tarıhynyń osy kezeńin zerdeleý jáne tarıhı ádilettilikti qalpyna keltirý jóninde júıeli jumystar júrgizilýde. Prezıdenttiń tapsyrmasy boıynsha Senatta birneshe jyl buryn aqparat jınaý jáne asharshylyq kezeńiniń derekti hronıkasynyń jınaǵyn shyǵarý jumystary bastalǵan bolatyn. Qoǵam men óskeleń urpaqtyń beıbit ómir súrýdiń qundylyǵyn túsiný jáne mundaı oqıǵalardyń qaıtalanýyna eshqashan jol bermeýi úshin osynyń bári asa mańyzdy», dedi Nurtóre Júsip.