Elordadaǵy Ulttyq mýzeıde Halyqaralyq balalardy qorǵaý kúnine arnalǵan «Balavision 2023» balalar kórmesi ashyldy. Onda mýzeıdegi keskindeme jáne grafıka úıirmecine qatysatyn jasóspirimderdiń shyǵarmashylyq jumystary kórsetildi.
– Búgingi kórme – balalar úshin úlken mereke. Olardyń jyl boıy oryndaǵan jumystary kórmege qoıyldy. Sýretter túrli tehnıkamen, kompozısııamen, san alýan sıýjetpen oryndalǵan. Balalar ári qaraı osyndaı kórmelerge qatysyp, jeńiske jete bersin, – dedi úıirme jetekshisi, Qazaqstan Sýretshiler odaǵynyń múshesi Muhtar Baıbosynov.
Ekskýrsııa jumystary, mýzeı pedagogıkasy jáne ekspozısııalyq zaldardy saqtaý qyzmetiniń basshysy Janar Beıisovanyń aıtýynsha, osy ýaqytqa deıin úıirme 10-nan asa jeke kórme ótkizgen. Sondaı-aq úıirmege qatysýshylar qaıyrymdylyq kórmeleri men baıqaýlarǵa qatysqan. «Balavision 2023» kórmesine 25 oqýshynyń ár túrli sýret salý tehnıkasynda jasalǵan 50-den asa jumysy qoıyldy.
Sonymen qatar kórmeniń ashylýynda «Baqytty balalyq shaq» atty merekelik konsert uıymdastyryldy. Oǵan Astanadaǵy mýzykalyq mektepterdiń ónerli oqýshylary qatysty.
Keskindeme jáne grafıka úıirmesi balalar kórmesin 2015 jyldan beri ótkizip keledi. Úıirmedegi oqytý baǵdarlamasy balanyń ásemdikke qatysty qabiletin jetildirip, ómirdegi jáne ónerdegi sulýlyqty sezine bilý qasıetin qalyptastyrady. Sondaı-aq úıirme jetekshileri álemdik jáne otandyq ónerdiń tarıhyn oqytyp, shyǵarmashylyq tapsyrmanyń oryndalý tehnıkasyn meńgertedi.
Mereı AÝǴALI,
L.N.Gýmılev atyndaǵy EUÝ stýdenti