Qonaev qalasynda balalardy qorǵaý kúnine oraı elimizdegi aýqymdy skeıt park ashyldy. Onyń jalpy aýdany – 9 400 sharshy metr, al alańnyń ózi 2 myń sharshy metrdi alyp jatyr.
Saıabaqtyń aýmaǵy kelýshilerdiń sanatyna baılanysty ártúrli aımaqqa bólingen. Atap aıtsaq, skeıt alańynan basqa velo jáne jaıaý júrginshiler jolyn, amfıteatr, sahna-podıýmdy kórýge bolady. Sondaı-aq demalýǵa jáne serýendeýge, sportpen shuǵyldanýǵa arnalǵan alańdar men balalar oıyn keshenderi qarastyrylǵan.
– Bul jaı ǵana skeıt tebýge arnalǵan alań emes, bul ártúrli jastaǵy turǵynnyń qyzyǵýshylyǵyn eskere otyryp jasalǵan tolyqqandy keshen. Munda oıyn alańdary, úlken kisilerdiń serýendeýine jáne demalýǵa laıyqty oryndar, sporttyq is-sharalarǵa arnalǵan vorkaýt bar, – dedi oblys ákiminiń orynbasary Rýstam Isataev.
Saltanatty is-shara barysynda Qonaev qalasynyń ákimi Nurlan Qumataev ta shahardyń damýyna qatysty pikirin bildirdi.
– Qalamyzda jasóspirimder sportpen shuǵyldanyp qana qoımaı, skeıtpen kásibı túrde aınalysqysy keledi. Eger buryn olar ýaqytyn tıimdi ótkizý úshin Almatyǵa barsa, endi bári bizge keledi dep oılaımyn. Sonymen qatar biz «Jeńis» saıabaǵyn qaıta quramyz. Bir sózben aıtqanda, aldaǵy ýaqytta qalamyzda túbegeıli ózgerister bolady, – dedi shahar basshysy.
Buǵan qosa mereke kúni 1,5 jastan 18 jasqa deıingi múmkindigi shekteýli balalardy beıimdeý, túzetý jáne ońaltý úshin kúndiz ýaqyt ótkizý ortalyǵynyń ashylýy da qala turǵyndaryn qýantty. Munda tirek-qımyl apparaty jáne psıho-nevrologııalyq aýrýlary bar balalarǵa dárigerlerdiń nusqaýy (jeke ońaltý jospary) boıynsha kómek kórsetiledi. Olardyń tasymaldanýy men 4 ret tamaqtanýyn qamtamasyz ete otyryp, tegin qyzmet alýyna múmkindik jasalǵan. Munda defektologter, logopedter, balalar psıhologteri, massaj terapevtteri jumys isteıdi, mýzykalyq sabaqtar men kásiptik terapııa, fızıoterapııa qarastyrylǵan. Sonymen qatar balalar mamandardyń baqylaýynda bolady.
Qapshaǵaı sý qoımasyndaǵy shomylý maýsymy da ádettegideı jazdyń alǵashqy kúni ashylǵanyn eske sala keteıik.
Almaty oblysy