Elordalyq zeınetker alaıaqqa aldanyp, Mekkege qajylyq jasaý úshin jınaǵan 16 mln teńgesinen aıyrylyp qaldy, dep habarlaıdy Egemen.kz.
Elorda polısııa departamenti baspasóz qyzmetiniń habarlaýynsha, jábirlenýshige belgisiz bireýler qońyraý shalǵan. Olar qyzynyń polısııada ekendigin jáne máseleni sheshý úshin shuǵyl túrde aqsha jiberý kerek ekenin aıtqan.
Egde jastaǵy áıel mán-jaıdy túsinbeı, aqsha jınaı bastaǵan. Zeınetker Mekkege qajylyq jasaý úshin jınaǵan 16 mln teńgesin sanaǵan. Biraq qyzynyń qaýipsizdigi mańyzdyraq dep oılap, aqshany kelgen adamǵa bergen. Keıin esine túsip, qyzynyń jaǵdaıy jaqsy ekendigin, óziniń alaıaqtardyń qurbany bolǵanyn túsingen ol polısııaǵa júgingen.Jedel-izdestirý is-sharalaryn ótkizý barysynda kýrer retinde kelip, áıelden aqsha alǵan 26 jastaǵy er adam anyqtaldy. Kúdikti «kýrer» qyzmeti úshin oǵan jalpy somanyń 10%-y berilýi kerektigin moıyndady.
«Atalǵan derekter boıynsha sotqa deıingi tergeý amaldary júrgizilip jatyr. Kúdiktiler Astana qalasynyń PD ýaqytsha ustaý ızolıatoryna qamaldy. Olardyń elorda aýmaǵynda jasaǵan basqa da osyǵan uqsas qylmystarǵa qatysy bar-joǵy tekserilip jatyr», dedi Astana qalalyq PD KPB bastyǵy Dastan Qalıev.
Astana qalalyq Polısııa departamenti azamattarǵa qyraǵy bolýdy, oqıǵanyń mán-jaıyna tolyq kóz jetkizbesten, beıtanys adamdarǵa aqsha bermeýdi eskertedi.