Memleket basshysy Qasym-Jomart Toqaev Sheteldik ınvestorlar keńesiniń otyrysy barysynda Qazaqstan azamattary sıfrlyq saýattylyqqa jáne bilimge basa nazar aýdarýy qajet ekenin aıtty, dep habarlaıdy Egemen.kz Aqordanyń baspasóz qyzmetine silteme jasap.
«Ekonomıkalyq ósim týraly aıtqanda, biz tek sıfrlar men kórsetkishterge ǵana emes, sapaǵa da mán berýimiz kerek. Osy rette Qazaqstannyń basty muraty – keleshektiń sıfrlyq ekonomıkasyna kóshý. Sıfrlyq ıntellekt ındeksine (Digital IQ) sáıkes Qazaqstan sıfrlandyrý qarqyny boıynsha 20-orynda jáne sıfrlyq ortany damytý jóninen anaǵurlym perspektıvti elderdiń qataryna kiredi», dedi Prezıdent.
Osy tusta Memleket basshysy ótken jyly elimizdegi sıfrlandyrý salasy 12 paıyzǵa óskenin eske salyp, otandyq sıfrlyq ónimderdiń halyqaralyq naryqtaǵy básekege qabilettiligi áli de artyp keletinin atap ótti.
«Byltyr IT ónimderi men qyzmetter eksporty 5 ese ulǵaıyp, 333 mıllıon dollardy qurady. Maqsatymyz – 2025 jylǵa qaraı bul kórsetkishti 500 mıllıon dollarǵa deıin jetkizý. Degenmen munymen toqtap qalmaımyz. Bul baǵyttaǵy jumysty jalǵastyramyz», dedi Qasym-Jomart Toqaev.
Jıyn barysynda el Prezıdenti sıfrlyq transformasııaǵa kedergi keltiretin faktordy atady.
«Adamı kapıtal sheshýshi ról atqaratyny bárimizge de málim. Biraq sıfrlyq transformasııaǵa kedergi keltiretin de osy – adamı faktor. Sıfrlyq úderisterdi basqarý úshin sıfrlyq saýattylyqqa jáne bilimge basa mán berýimiz qajet ekenin túsinýge tıispiz. Túpki maqsat – sıfrlyq ósimge baǵdarlanǵan kreatıvti qoǵam qalyptastyrý. Bizdiń adamdar jańa ıdeıalardy qabyldaýǵa, jańasha oılaý men jańa nárse oılap tabýǵa beıimdelýi kerek», dep túıindedi Qasym-Jomart Kemeluly.
Aıta ketsek, Sheteldik ınvestorlar keńesiniń otyrysynda Eýropalyq qaıta qurý jáne damý bankiniń prezıdenti Odıl Reno-Basso, Premer-mınıstrdiń orynbasary – Syrtqy ister mınıstri Murat Nurtileý, Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın, «Qazaqstannyń sheteldik ınvestorlar keńesi» qaýymdastyǵynyń basqarma tóraǵasy Erlan Dosymbekov, Azııa damý bankiniń prezıdenti Masatsýgý Asakava, CNPC kompanııasynyń prezıdenti Hoý Szıszıýn, Shell plc kompanııasynyń bas atqarýshy dırektory Ýael Saýan, Chevron korporasııasynyń atqarýshy vıse-prezıdenti Naıdjel Hırn, Philip Morris International kompanııasynyń TMD jáne Ortalyq Azııa boıynsha prezıdenti Marko Marıottı, «LÝKOIL» kompanııasynyń bas atqarýshy dırektory Vadım Vorobev, Ernst&Young kompanııasynyń Eýropa, Taıaý Shyǵys jáne Afrıka aımaqtary boıynsha basqarýshy seriktesi Djýlı Lınn Tıgland, Air Liquide kompanııasynyń bas atqarýshy dırektory Fransýa Jakov, Baker Hughes kompanııasynyń tóraǵasy jáne bas atqarýshy dırektory Lorenso Sımonellı, Microsoft korporasııasynyń Ortalyq jáne Shyǵys Eýropa bólimshesiniń bas dırektory Mıshel Sımmons, Wabtec korporasııasynyń prezıdenti jáne bas atqarýshy dırektory Rafael Santana sóz sóıledi.